12 iku pekebun di Pantai Damai nerima bantu sum sawit enggau lada

KUCHING: Sepenyampau 12 pekebun mit sawit ba sitak Dun Pantai Damai nerima Bantu Sum Sawit enggau Lada (BBKSL).

Menteri Muda ba Opis Kepala Menteri (Pekara Islam enggau DBKU) Datuk Dr Abdul Rahman Junaidi madah, tebal agi penerima datai ari Kampung Sri Kandong, Kampung Jaya Bakti, Kampung Sungai Lumut enggau Kampung Sungai Batu ti suah nanam sawit.

Ku Abdul Rahman, semua pekebun mit nerima sum berat 50 kilogram (kg) siku.

“Nya bantu renggat keterubah lalu semua penyereta udah nitihka atur ditetapka Opis Betanam Betupi Sarawak.

“Terima kasih Opis Betanam Betupi Sarawak laban nyaup pekebun mit enggau pedagang tani kitai,” terang iya.

Abdul Rahman mansutka jaku nya ba aum pemberita pengudah nyuaka BBKSL ngagai pekebun mit Dun Pantai Damai, kemari.

Abdul Rahman ke mega Menteri Muda Utiliti (Bekal Ai) madah, Opis Betanam Betupi Sarawak mega bisi bemacham program bantu dikena nyaup komuniti dalam bidang betanam betupi.

“Sebedau tu, program AgriCOP ti dipejalai nya dikena meransang mensia mayuh ke bisi tanah puang ulih ngemansangka tanah nya enggau pengawa betanam betupi.

“Pengawa betanam betupi nya bidang ti ulih nambahka penatai pemisi kelimpah mantu komuniti bebelika sayur tauka buah ke baru,” terang iya.

Sama datai Pegawai Opis Betanam Betupi Bagi Menua Kuching, Chong Mui Sia.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak