Adat demokrasi, sapa-sapa ulih nyadi chalun

PAKAN: Kami udah sedia napi Pengawa Bepilih Besai Nengeri Ke-12 (PRN12) tu enggau juluk ati nyaup Gempung Parti Sarawak (GPS) ngetanka penuduk Pakan, ku pelobi chalun Parti Demokratik Progresif (PDP) Gawan Saut.

Iya madah munyi nya maya Program Belepa Ujung Minggu ba ba Rumah Jambai anak Dangat di Nunggang ditu, ensana.

“Aku enggau tim tu udah sedia napi PRN tu lalu aku minta rayat tetap milih GPS,”ku iya.

Ngelansa pasal chalun bukai ke bela ngining bediri ngarika PDP,Gawan madahka nya pengawa ke manah lalu nadai salah nguji laban tu adat demokrasi lalu ngayanka PDP tu entara parti ti seruran nerima sambut ari mensia mayuh kelebih agi peranak Pakan.

“Pengawa ngelakuka diri nyadi chalun nadai salah laban PDP siti ari parti ti ngembuan penemu ti tebuka lalu nandaka adat demokrasi idup ba menua kitai.

“Tang pemutus nama chalun ti deka ngarika GPS endang bepanggai ba Chairman GPS Datuk Patinggi Abang Johari Tun Openg sereta Presiden PDP Datuk Seri Tiong King Sing.

“Semina GPS aja ulih mai pemansang ngagai menua kitai lalu beri mih peluang GPS gawa baru ungkup rayat di Sarawak kelebih agi ba Pakan,”ku iya.

Iya mega bisi ngelansa pengawa besekula lalu madahka tu mih utai lumur satu pemadu beguna dalam pengidup dikena ngemansangka diri empu enggau diri bilik.

Sama bisi mansutka jaku lebuh program nya mega, Mandal Chairman PDP Pakan TR Andrew Isop Cherang madahka Gawan entara chalun ti patut ngarika PDP enggau GPS.

“Aku nyukung Gawan. Anang saru enggau sekeda jaku madahka Pakan deka diambi Parti Pesaka Bumiputra Bersatu (PBB).Penuduk Pakan endang udah ungkup PDP lalu sida PBB pan nemu lalu sida iya nyukung kitai (PDP), “ku Andrew Isop.

Udah nya, Tr Jambai anak Dangat madahka diri bela nyukung Gawan lalu arapka iya mujur dipilih chairman GPS ngarika Dun Pakan.

Dulu agi ari tu, program ke sebaka bisi diatur PDP Pakan ba Rh Janin Supi lalu nerima timbal ti manah ari mensia mayuh ba genturung menua nya.

Suara Sarawak