Agenda sosioekonomi diberi perati perintah

KUCHING: Gempung Parti Sarawak (GPS) deka meri perati ngagai sektor betanam betupi moden dikena mantu peranak menua pesisir ngulihka penatai pemisi ke lebih manah.

Sapit Kepala Menteri Datuk Amar Douglas Uggah madah agenda betanam betupi moden endang sebengkah pengawa dikena ngangkatka tikas pengidup rayat menua pesisir.

Iya madah munyi nya ba Program Ngabas Komuniti Betanam Betupi (AgriCOP) ba Rh. Remi anak Ambau, Muton.

“Agenda sosioekonomi patut diberi perati taja perintah udah mayuh meri pemansang ba sukut infrastruktur.

“Tu beguna dikena mantu peranak menua pesisir ke balat tusah ketegal pengerekai pandemik Covid-19,” ku iya.

Uggah mega minta peranak menua pesisir meri perati ngagai pengawa nanam rian laban asil utai tanam nya dipeda nerima peminta ke chukup tinggi ba makit eksport.

“Sepenyampau RM60 juta agih belanja udah diagih dikena meli baja ungkup raban pekebun sawit enggau lada.

” Raban orang bumai mega bisi nerima 12 guni baja ungkuo sebansa utai tanam,” ku iya.

Udah nya, Uggah madah geran beungkus RM500,000 deka diagih dikena ngangkatka pengawa nupi jelu enggau nupi ikan dalam sangkar.

Nangkan ke nya, iya madah diri meri agih RM10,000 ungkup Gerempung Apai Indai enggau Pengajar (PIBG) di SK Muton enggau RM2,000 ungkup 10 buah biro indu.

Kenu ku Uggah dikena nyapai jukuk perintah rayat patut meri sukung ngagai perintah GPS.

Iya madah, GPS ukai semina bejaku ngapa tang bebendar nyapai agenda ke udah dilanggur.

Pia mega langgur pemansang sosioekonomi tu deka meri pemaik ngagai mensia mayuh.

Nya alai, iya ngarapka rayat terus meri sukung ngagai perintah awakka pemansang ulih terus dikemujur ba nengeri tu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak