Ampuh bah ba rumah panjai Basi Ili, Engkilili agi balat

ENGKILILI: Penusah ampuh bah ke nuntung ba Rumah Tengak, Basi Ili ditu dini hari urung pukul 3 pagi tadi majak balat.

Nitihka penerang ari peranak rumah panjai nya ampuh bah nya nyadi kenyau pagi ensana lalu mua ke dini hari tadi ai majak pasang sereta terus niki nyentuk tiga kaki penalam ba dalam rumah.

Siku peranak rumah panjai nya, Joseph Andrew Geraik, 51, madahka ai berengkah niki baru ba rumah panjai sida mua ke dini hari lalu chukup lubah belinsur surut.

Ku Joseph, rumah panjai sida sigi ninting taun dituntung penusah ampuh tiap kali musin landas tang penusah ampuh balat baka ke diatu nyadi 2004 enggau 2016.

Nya alai, dikena bejejaga sida serumah bisi ngaga semetung ba mua pintu bilik diri empu dikena nagang ai tama ke bilik laban beratika ruai semampai kena bah ninting taun.

MAJAK BALAT…gaya sekeda genturung pendiau Rumah Tengak, Basi Ili ti kena tuntung penusah ampuh bah urung pukul tiga pagi tu tadi.

“Ampuh bah serak tu balat ngerugi kami serumah ketegal mayuh keresa reta tengkira rusak enda sempat dikatung,”ku Joseph nusuika sebana ngagai Ruai Suara Sarawak tadi.

Berebak enggau nya, Joseph mesan sida serumah sama bela bejejega enggau tikas ai ke niki beduduk hari gaya hari ke suah ujan.

Iya mega ngarapka ejensi tauka raban Komiti Penyaga Penusah Nengeri (JPBN) Sarawak bisi datai ngesah tauka mantu sida serumah ke benung tasah.

Naka berita tu ditulis bisi mega rumah panjai bukai di pelilih Engkilili ke benung napi penusah ke sebaka iya nya Rh.Ayum Nyaring, Ensurai, Rh. Dennis Nayang, Ensurai, Rh. Maria Balin, Merebong enggau Rh. Kujat, Ijok.

Nangkan ke nya, penyandang Dun Engkilili, Dr Johnical Rayong Ngipa bisi ngabas empat rumah panjai ke ampuh bah seraya nyuaka bantu ngagai Rh. Ayum, Rh. Dennis, Rh. Maria enggau Rh. Tengak.

Penyandang Dun Engkilili, Dr Johnical Rayong Ngipa pagi tadi bisi ngabas empat rumah panjai ke ampuh bah.
Penyandang Dun Engkilili, Dr Johnical Rayong Ngipa pagi tadi bisi ngabas empat rumah panjai ke ampuh bah.
Penyandang Dun Engkilili, Dr Johnical Rayong Ngipa pagi tadi bisi ngabas empat rumah panjai ke ampuh bah.
Penyandang Dun Engkilili, Dr Johnical Rayong Ngipa pagi tadi bisi ngabas empat rumah panjai ke ampuh bah.

Suara Sarawak