Asadia deka seruran ngenang pengeransing niang ngetan main asal Iban

KUCHING: Akademi Serakup Dayak Iban Sarawak (Asadia) deka seruran ngenang pengeransing Sapit Kepala Menteri niang Tan Sri Datuk Amar (Dr) James Jemut Masing dalam ngetan ke main asal Iban.

Tuai Asadia Mabong Unggang madahka raban ASADIA chukup sinu ke pemidang Masing kena pagi Hari Minggu tu tadi.

“Asadia endang semampai betanya ngagai niang senentang adat enggau main asal kitai bansa laban iya siku orang ti bisi peneleba sereta enggau bepenemu ba main asal Iban,” ku Mabong madah nengah sebengkah penerang, kemari .

Nangkan ke nya, ku pengajar Mabong niang tu siku tuai ke enda rangka enggau penemu sereta seruran nyukung Asadia nengah chara meri geran enggau peransang ngambika ulih ngerembaika main asal bansa Iban.

Kelimpah ari nya, niang siku orang ti siru ke main asal bansa diri sereta ngembuan perening enggau runding ti jauh deka ngangkatka bansa Iban.

“Iya mega siku ketuai ti berani sereta ngembuan chara ti engkeman lebuh ngatur pengawa bekaul enggau menua.

“Aku ngari ke semua raban Asadia meri penyinu ati ngagai sida niang sebilik lalu besampika semengat niang lantang begulai enggau Petara di serega,” ku iya.

Suara Sarawak