Asil dero Laura Budom mayuh nerima puji ari penguna media rama

Pengelandik kitai mensia ditempa Petara endang enda sebaka lalu chara kitai ngena pengelandik pan mayuh bida.

Bisi nya landik ba pengawa rama, pelajar lalu macham-macham mih pengelandik ke bukai.

Ba menua Sungai Nyurok, Budu Krian, Saratok bisi siku indu benama Laura anak Budom ngembuan pengelebih sereta chukup landik nero mua mensia.

Asil mua mensia ke didero iya mayuh dipuji bala orang ke udah beguna servis iya ba nero mua.

Laura berengkah nelebaka diri ba pengawa nero kenyau ari umur iya lima taun.

Laura benung mandangka nero mua siku penguna.

Keterubah iya nero semina dikena ngisi maya lepa tang pengujung nyau pulaika pengerindu iya lalu nyadika batang pengawa iya besehari-sehari nyentuk ke sehari tu.

PERANSANG DIRI SEBILIK

Maya dirandau Suara Sarawak, iya madah entara orang ti semampai nyukung lalu meri iya peransang ba pengawa nya endang sida sebilik empu lebih agi apai enggau indai iya.

“Apai enggau indai mih pemadu mayuh meransang aku ngujungka aku terus ransing agi nero mua orang,” ku iya.

Kenu ku tusui Laura, sekumbang pengerekai pandemik Covid-19 iya nerima mayuh peminta nero gambar mua ari mensia mayuh.

“Aku nero mua orang endang nitihka gambar ke diberi enggau peminta penguna empu.

“Selalu iya sida ngirum nengah aplikasyen Whatsapp. Udah nya, sida nerang baka ni pendiau gambar ke dikedeka diri,” ku iya.

Mua Francisca Luhong mega bisi didero Laura.

NERO MUA ORANG TEBILANG

Udah nya, ngelansa pasal gambar mua orang tebilang kaya didero iya, Laura madah diri kala nero mua Miss Universe Malaysia 2020 Francisca Luhong James enggau penanyi Depha Masterpiece.

“Dua iti gambar tu mih entara asil kereja iya ti nerima mayuh sukung ari penguna media rama lebuh gambar dua iku tu dipandangka ba Facebook,” ku iya.

Nangkan ke nya, ngelansa pasal rega asil dero, dia Laura madah nya bepanggai ngagai peminta sida.

“Rega RM50 ungkup nero gambar siku orang aja dalam siti keretas burak, udah nya, enti dua iku orang didero diletak aku RM100 enggau RM150 ngagai sida ti minta didero tiga iku mua.

“Tang naka tu aku bedau nerima peminta nero tiga iku orang,” ku iya.

Laura mega madah chara iya nganjung asil dero ngena servis Poslaju tauka J&T.

BEKUALITI…Entara gambar mua bukai ke kala didero Laura.
BEKUALITI…Entara gambar mua bukai ke kala didero Laura.

Ungkup peranak menua Saratok endang nadai dichaj aku bayar pos tang ari luar Saratok enggau sigi diletak aku rega mayar tambah RM10 aja ungkup ungkus ngepos barang sida.

Udah nya, Laura ngembuan juluk deka terus ngerembaika pengelandik iya nero tu nyadi dagang enggau ngarapka pengawa nya terus nerima sukung ari mensia mayuh.

Laura mega mesan barang ti bisi penau nero anang natam pengelandik diri tang pengelandik nya patut dibantai enggau dikerembai ngambika iya terus idup.

Leka jaku ke seruran nyadika pengering Laura napi pemar ngelama tu iya nya madah diri ‘Aku Ulih’.

Pengelebih tauka pengelandik ke dikembuan Laura ngujungka iya seikas enggau orang bukai taja pan ba dunya nyata iya siku ari raban nyelai pendiau (OKU) Cerebral Palsy.

Penanggul nya enda kala ngelemika Laura bekarya tang seruran beterima kasih ngagai Petara laban udah meri siti pengelebih ke seikas enggau orang ke menyana.

Mensia mayuh ti ngujika servis nero digaga Laura ulih berandau terus enggau iya nengah Facebook Ziby Zeis Laura Artistry.

KENANG…Siku penguna begambar kenang enggau Laura maya ngambi asil dero ke chukup ngemantupka ati iya. 
Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak