Aspirasi ngining bediri ba 20 penuduk Dun sitak mengeri

SIBU: Dijangka lebih ari 20 penuduk Dun diining Parti Aspirasi Rakyat Sarawak (Aspirasi) ngambi bediri maya Pengawa Bepilih Nengeri Ke-12 (PRN12).

Sapit Chairman iya, Simon Tiong madah majoriti penuduk nya penuduk sitak ba mengeri.

Taja pia ku iya, Aspirasi mega ngining penuduk majoriti Bidayuh.

“Naka diatu, kami ngining bediri ba 20 tauka lebih sitak Dun ungkup PRN-12.

“Kami mega ngining penuduk majoriti Bidayuh tang pekara nya agi diperunding,” ku iya nerang, kilah ensana.

Taja pia, Tiong enggai madah silik pasal pekara nya seraya madahka pekara tu deka dibantai ila.

Berebak enggau nya, iya ngarapka Aspirasi ulih nempa pemujur maya PRN-12 sekali tu ngambi mai mayuh agi juluk enggau mai sada rayat dalam Aum.

Sebuah surat kabar ngaga ripot kena 22 Disember 2020 pasal Aspirasi merambu bediri abis nadai enam penuduk Dun ba Wilayah Tengah maya PRN-12.

Presiden iya, Lina Soo madah, sitak Dun iya nya Nangka, Pelawan, Bukit Assek enggau Dudong di Bagi Menua Sibu sereta Repok enggau Meradong di Bagi Menua Sarikei.

Tiong, 53, siku pedagang ke sebedau tu kala dibantaika parti iya bediri ba Dun Pelawan.

Maya PRN-11 ba taun 2-16, Tiong kala bediri ba Dun Nangka enggau bulih 773 undi alah ngelaban Dr Annuar Rapaee ari PBB ti bulih 9,617 undi seraya Abdul Raafidin Majidi ari PKR bulih 2,000 undi.

Aspirasi udah numbuhka gempung politik dikumbai Gasak enggau raban politik baka Parti Pekerja Sarawak (SWP), Parti Bansa Dayak Sarawak Baru (PBDSB), Sarawak for Sarawakians (S4S), Sarawak Liberation Movement (SLM) enggau Perikatan Kemerdekaan Sarawak (SIA).


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak