Baram deka dikemansang nengah HDA

MARUDI: Perintah Sarawak bisi perambu ngemansangka sitak Baram nengah Ejensi Pemansang Tanah Tinggi (HDA), ku Kepala Menteri Datuk Patinggi Tan Sri Abang Johari Tun Openg.

Ku iya, entara infrastruktur ti dikemerat iya nya bekal ai enggau bekal kuasa karan ke chukup beguna kelimpah ari jalai raya ti deka nyerungkai sitak Baram tu.

“Tiga pekara besai tu deka dipejalai begulai enggau siti agi infrastruktur iya nya digital infrastruktur (arus Internet) ke mesti disambung ba menua pesisir,” terang iya.

Abang Johari mansutka jaku nya ba aum pemberita pengudah bejadika Projek Bekal Ai Menua Pesisir (BALB) Sitak Marudi, Bagi Menua Miri, ditu kilah ensanus.

Taja pia ku iya, pemansang ba sitak Baram tu begunaka timpuh ungkup dipejalai.

“Nya kebuah, kitai minta rayat meri mandat baru ngagai perintah ke diatu enggau perintah ti tegap ngambi kami nampung perambu kitai di baruh HDA lebuh ngemansangka sitak Baram.

“Aku udah ngagihka belanja RM 1.5 bilion ba timpuh dua taun tu ngagai HDA enggau agih belanja nya deka ditambah nitihka peminta ba sitak Baram tu,” ku Abang Johari nerang.

Abang Joahri madah baru, pekara pemadu beguna diatu nya rayat mesti seati sereta meri kerejasama rat ngagai perintah.

Suara Sarawak