Bekerejasama negika nasip rayat

SIMUNJAN: Kaban Parlimen Puncak Borneo, Datuk Willie Mongin meransang peranak Sarawak meri sukung penuh ngagai Gempung Parti Sarawak (GPS).

Kenu ku Sapit Menteri Pemansang Kebun enggau Komoditi nya, tu beguna ngambika Sarawak terus dipegai perintah ke tegap.

“Enti kitai dipegai perintah nengeri ke tegap, kita mega deka dipegai perintah besai ke tegap, nya deka mantu ngelengkaska program pemansang enggau mega bantu ngagai rayat,”ku iya maya bejadika taba ramp Gerempung Kerejasama Nanam Sawit (KPSM) Pelilih Serian Berhad nyerumba Program Pejalai Agrikomoditi Ke Palan Timbang KPSM Pelilih Serian Berhad ba Kampung Sabun, ditu, kemari.

Willie madah kebuah pia laba iya udah ngasaika gawa dibaruh tiga iku Menteri Besai enggau ngasaika dipegai tiga bengkah perintah.

“Aku udah nemu baka pemedis nya, lalu aku ngarapka kitai ulih bekerejasama enggau perintah perintah sereta perintah besai ke pemaik negika nasip rayat,” ku iya.

Kelimpah ari nya, Willig madah dibaruh pegai perintah besai ke baru, agih belanja sepenyampau RM35 juta udah dikemendar ungkup skim nanam baru sawit nengah geran.

“Enti dulu suba maya pegai perintah Pakatan Harapan geran tu ditukar ngagai jali lalu nya nating bala pekebun mit,” ku iya.

Iya madah ba Bajet 2022 jali nya diubah baru ngagai geran geran enggau meri pengelantang ngagai raban pekebun kategori B40 ke bisi nanam sawit.

Ku iya, pekebun sawit nya mega deka diberi benih klon kelapa sawit ke manah enggau baja dikena nyungkak asil kebun sida.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak