Bekimpin mih ngena media rama

KUCHING: Pengawa Bepilih Nengeri (PRN) Ke-12 ti diatur maya pandemik Covid-19 nya entara pemar besai ngagai parti ti bediri.

Ngelansa pasal pekara nya, Sapit Kepala Menteri Datuk Amar Douglas Uggah Embas minta Ketuai Parti Pesaka Bersatu (PBB) enggau penyukung iya seruran sedia.

Uggah mansutka jaku nya ba Randau Begulai enggau Peranak di Rumah Legum ba Serungup, ditu kemari.

Ku iya, deka mayuh pemar mesti ditapi semua chalun ti bediri minta pilih dalam PRN tu ila.

“Sebarang gempuru ungkup pengawa bekimpin deka ditatak tang kena mih pelasar media rama, randau video enggau ke bukai dikena ngenataika pesan ngagai pengundi,” terang Uggah.

Iya madah baru, genap chalun ti bediri minta pilih mesti nemu penerang pemadu baru pasal polisi enggau perambu perintah ngambi nerima sukung rayat.

Atur Pengawa Standard (SOP) baru mega deka diputuska Opis Menteri Pengerai Malaysia (KKM) enggau Komiti Besai pengawa Bepilih dikena nagang pengerekai Covid-19.

Taja pia, iya andalka peranak Saribas enda belampung ati nyukung GPS lalu iya pechayaka peranak ba Saribas deka ngaga pemutus ti betul baka pengawa bepilih ke dulu.

“Aku pechayaka sida deka tetap sama ba pengawa bepilih ke deka datai laban sida agi begunaka mayuh agi agih belanja ungkup pemansang,” ku iya ba pengawa nya.

Ba lansa sama, Uggah madahka geran perintah penyampau RM128,000 deka diagih ungkup projek selapat bah, jalai kebun enggau belanja ungkup Komiti Pemansang enggau Pengelikun Genturung Pendiau (JKKK) rumah panjai sereta gerempung indu.

Ba pengawa nya mega, ex-Adun Saribas, Mohd Razi Sitam ngelalau rayat meri mandat baru ngagai GPS.

“GPS udah bebendar nagih hak menua di baruh Sempekat Malaysia 1963 (MA63) ti udah lenyau ngelama tu.

“Kepala Menteri enggau raban kabinet iya mega udah bejalaika bemacham inisiatif dikena nambahka pemansang di Sarawak,” ku Razi.

Nya alai, Razi ngarapka rayat Sarawak meri sukung enggau peluang ngagai semua chalun GPS nyapai juluk ke besai agi ungkup menua tu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak