Beri aku lima taun agi ngatur pemansang

BARAM: “Beri aku lima taun agi, lebuh aku nyebut, aku deka ngadu semua nya tembu (When I say it, I deliver it),” ku Kepala Menteri Datuk Patinggi Abang Johari Tun Openg.

Iya bejaku munyi nya ngelansa pengawa perintah ti deka ngaga jalai alun ari Trusan disambung ngagai Baram nuju Sabah.

“Bebaka orang lumba perau, mayuh cherita deka ayan udah tu, tang aku nyerahka ngagai rayat ngambika ulih meda pekara di mua.

“Pagi tadi aku ngagai Trusan, ke alai kitai ngemansangka jalai alun ari Trusan ngagai Sabah, ke alai jalai alun nya kitai sambung ngagai Baram,” ku iya.

Abang Johari bejaku munyi nya ba Program Nasih Tanah Rumah Panjai Long Laput di baruh Skim Bantu Rumah Menua Pesisir Sarawak di Baram, kemari.

Ku iya, sebedau tu penyakal kala madah Sarawak deka bangkrap dalam timpuh tiga taun laban belanja besai manggai RM10 billion ngagai rayat.

“Diatu, udah lebih tiga taun tang penatai pemisi menua kitai betambah.

“Beri aku lima taun, aku deka mandang ngagai sida iya,” ku iya.

Abang Johari madahka Baram sebedau nya dipansik laban palan tu besai sereta luas.

“Nya kebuah kitai ngaga pelasar ti nyemetak lebuh deka ngemansangka palan ti besai tu.

“Aku enggau bala bakih ngaga pansik sereta mechahka Kaunsil Pemansang Koridor Wilayah (Recoda) ngagai tiga ejensi iya nya Ejensi Pemansang Ulu Rejang (Urda), Ejensi Pemansang Tanah Tinggi (HDA Baram) enggau Ejensi Pemansang Wilayah Utara (NRDA).

“Lebuh palan tu udah dibagi, ekonomi enggau rama ulih dilanggur kitai ba timpuh pandak enggau panjai,” ku iya.

Iya madahka, nengah pekara tu mega perintah uluh ngatur agih belanja ungkup projek di palan nya.

“Kitai mega ulih meri servis ti manah ungkup rayat, tu meh pekara ti digaga aku.

“Diatu kitai merambu ngemansangka jalai alun ngagai serata menua Baram, reti iya ari Miri kitai deka ngaga jematan Baram di Marudi nuju Long Terawan di Mulu.

“Di Mulu, kitai nyambung jalai ti digaga ba Limbang nuju Gunung Buda.

“Ari Gunung Buda terus ke Lawas sereta ke Sabah,” ku iya.

Iya madah baru, Baram nangkan tu ila deka ngembuan ‘jajaran’ jalai ari Miri nyentuka Long Terawan sereta Sabah.

“Ari nya, kitai ulih muka sektor betanam betupi laban udah bisi logistik kelimpah sektor dagang temuai.

“Tu deka meri empas ngagai ekonomi peranak menua,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak