Bersatu enggau BN endang bakih GPS – Abang Jo

BELAGA: Kepala Menteri Datuk Patinggi Tan Sri Abang Johari Tun Openg meri terima kasih ngagai Bersatu enggau Barisan Nasional (BN) laban enda ngeletak chalun di Sarawak dalam Pengawa Bepilih Besai Nengeri (PRN-12) ti deka datai.

Chairman Gempung Parti Sarawak (GPS) nya madahka Bersatu enggau BN endang bakih GPS ba Perintah Besai.

“Baka nya mega enggau gerah ti dipadahka Tan Sri Annuar Musa ti madahka Barisan Nasional nadai ngeletakka chalun bediri dalam PRN ti deka datai.

“Tu meh semangat ti manah ngagai kitai kelebih agi kitai bisi pengari rayat ba Perintah Besai ke alai Bersatu enggau BN bisi din,” ku iya.

Abang Johari bejaku munyi nya lebuh ditanya pemberita pengudah tembu Program Tuai Begulai enggau Rayat di Sungai Asap, Belaga ditu tadi.

Ku iya, kededua parti nya engka udah meretika gaya politik ti bisi di Sarawak iya nya awakka orang Sarawak empu nentuka nama ti nyadi di menua tu.

Suara Sarawak