Dalam politik mesti bisi prinsip

SARATOK: “Ukai kitai enda ingatka jasa tauka enda rinduka Yb Ali Biju, tang dalam bepolitik kitai patut bisi prinsip ngambi undi rayat enda pambar sereta nyaga kaul perintah besai enggau perintah nengeri,” ku Datuk Abdul Wahab bin Aziz.

Ex- Adun Kalaka nya madah penyandang Kaunsil Nengeri Dun, Krian Datuk Ali Biju enda ibuh pedis pala ngerundingka penuduk sitak nya ba Pengawa Bepilih Besai Nengeri Ke-12 (PRN-12) tu.

Ku iya, Ali patut berunding panjai ke pemaik rayat ba Dun Krian. Teju chalun Gempung Parti Sarawak menang, awakka rayat ditu bela bulih agih belanja ari perintah besai enggau perintah nengeri.

“Iya (Ali Biju) nyangka ngasaika diri agi kering lalu andal menang di Krian.

“Pia mega, pengeran iya bediri nyangka ari ansak bala penyukung, kitai enda nemu.

“Tang, iya bediri nengah tiket Parti Bumiputera Bersatu Malaysia (Bersatu), bisi tauka enda Presiden parti meri pemendar ngagai iya bediri ngarika parti nya?” ku iya.

Wahab madah munyi nya maya dirandau pemberita ba Opis Kaunsil Pengibun Turu Pengintu Pendiau Islam Sarawak (Lakis) ditu, kemari.

Nangkan ke nya, ku Wahab enda patut Presiden Bersatu Tan Sri Muhyiddin Yassin ngemendarka Ali bediri ila ngena lambang Bersatu.

“Kitai sama nemu, GPS enggau Bersatu endang udah besemaya deka bekerejasama sebedau tu.

“Nyema iya (Ali) tetap keran bediri ba PRN-12 tu, manah agi iya bediri nengah chalun independent,”ku iya.

Suara Sarawak