Dewan Bandaraya Miri deka nyadi ikon baru

MIRI: Mengeri Miri deka nyadi mengeri pintar ke besai guna ukai semina ari sukut pemansut minyak tang mega bisi pengulih dalam industri dagang temuai.

Nya mih jaku Kepala Menteri Datuk Patinggi Tan Sri Abang Johari Tun Abang Openg lebuh bejadika Dewan Bandaraya Miri di Marina Park City, kilah ensana.

Ku iya, perambu bejalaika projek besai iya nya Dewan Bandaraya Miri udah dibantai ba taun 2004 pengudah Kaunsil Mengeri Miri ngaga pemutus kena 26 June 2004 mantaika peminta ngagai Perintah Sarawak enggau Perintah besai ngaku Kaunsil Mengeri Miri nyadi Kaunsil Mengeri Besai Miri.

Pengawa nasih tanah udah dipenyadi Tuai Pemegai Menua (TYT) Tun Pehin Sri Abdul Taib Mahmud lebuh iya agi mangku pengawa nyadi Kepala Menteri Sarawak kena 22 Mei 2010 tang projek nya enda ulih dipejalai ketegal suntuk belanja.

Lebuh Pengerami Makai Taun Ke-13 Hari Mengeri Besai Miri kena 7 Julai 2018, Abang Johari udah madahka agih belanja deka disediaka nirika Dewan Bandaraya Miri ti baru.

Projek Dewan Bandaraya Miri tu udah tembu ujung bulan Februari 2021 lalu nya begunan semilan ringkat nyadi diatu nyadi ikon pemadu baru di Mengeri Besai Miri.

Sama datai Menteri Kaunsil Kandang Menua enggau Pengawa Berumah Datuk Seri Dr Sim Kui Hian enggau Datuk Bandar Miri, Adam Yii Siew Sang sereta bala bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak