Dun Mulu dikeandal terus mansang

MULU: Kepala Menteri Datuk Patinggi Tan Sri Abang Johari Tun Openg pechayaka Dun Mulu deka terus mansang dipegai Perintah Gempung Parti Sarawak (GPS).

Ku iya, sitak nya deka berubah sereta nyerungkai pengulih ekonomi pengudah Palan Servis Mulu nyengkaum projek jalai raya tembu ba timpuh lima taun.

“Ukai mudah ngemansangka sitak Mulu tang kitai deka ngemansangka sitak tu ari Miri – Marudi, Marudi ke Long Terawan udah nya ngagai Long Iman.

“Pengudah jalai raya tu tembu ila, kitai ulih ngena entukar ari Miri ngagai Long Terawan sebarang maya, enda ibuh agi nganti bilun ti bepanggai ngagai gaya hari baka diatu.”

“Nya kebuah, aku deka ngiga chara ngemansangka Mulu tang sitak nya jauh laban aku pechayaka sitak nya deka terus maju enggau meri pemanah ngagai komuniti ditu,” terang iya.

Abang Johari mansutka jaku lebuh bejadika Pengawa Nasih Tanah Palan Servis Mulu, ditu kemari.

Chairman GPS nya nyemetak madah, Perintah GPS naka ulih ngiga agih belanja tang begunaka mandat enggau kuasa ari rayat laban udah abis timpuh bulan June tu tadi.

“Aku berani mansutka agih belanja besai ungkup pemansang laban udah dikira kelimpah Sarawak bisi pun penatai pemisi kediri baka chukai jual nengeri (SST) ba produk petroleum.

“Suba, bala penyakal madahka Sarawak deka bangkrap ba timpuh tiga taun enti aku terus megai menua enggau chara baka tu (meri agih belanja besai ungkup pemansang), tu udah taun keempat tang penatai pemisi kitai majak nambah.”

“Nya mih chara penyakal, bejaku aja pandai tang enda ngereja pengawa. Aku bejaku tang aku ngereja pengawa laban aku arapka Tuhan, nama ke dipadah aku deka ditanya ila.

“Laban kami meg bepengarap Islam nemu, lebuh midang ila deka ditanya nama ke udah dikereja aku ngagai rayat.

“Nya kebuah aku mesti ngamatka semaya nya laban aku takut ke Tuhan,” ku iya nerang.

Abang Johari nyemetak madah, nya kebuah aku ngamatka semaya nirika palan servis nya ngena agih belanja Perintah Sarawak ti disemaya bulan April tu tadi laban iya siku ketuai ti bisi prinsip semampai ngamatka semaya.

Ba Pengerami Tuai Begulai Enggau Rayat di Mulu bulan April tu tadi, Abang Johari madah, Perintah Sarawak setuju neruska pelin pemansang dikena numbuhka Pasar Mit Mulu ngena agih belanja kediri ngambi nangkup peminta peranak sereta industri dagang temuai sitak nya.

Sarawak ngaga pemutus nirika palan nya kediri ungkup pemaik rayat taja kebendar nya di baruh tanggung pengawa Perintah Sarawak.

Palan servis nya deka nyendiaka bemacham perengka guna baka Palan Transfomasyen Menua Pesisir (RTC), tamu, medan selera, palan seni, mesejit, gerija, balai komuniti, stadium enggau ke bukai.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak