Gaga mayuh rumah jelan rega di Sarawak

KUCHING: Kunteriktor pengawa berumah diperansang nyendiaka mayuh agi rumah jelan rega dikena nentuka peranak menua tu bisi rumah kediri.

Menteri Muda ba Opis Kepala Menteri (Undang-Undang, Kaul Perintah Sarawak-Perintah Besai enggau Matau Projek), Datuk Sharifah Hasidah Sayeed Aman Ghazali madah, inisiatif nya ulih mantu raban B40, M40 sereta nembiak meli rumah kediri ti bekualiti enggau jelan rega.

Adun Samariang mansutka jaku nya ba Pengawa Nyain Sempekar Pemereti Ati (MoU) entara Hornbill Networks Consortium Sdn Bhd enggau Asteel Group ba Palan Aum Besai Borneo Kuching (BCCK), sehari tu tadi.

Ngelansa pasal kerejasama nya, Hasidah muji inisiatif kededua serikat nya nyendiaka rumah ulih dibeli ti bisi kualiti ba sitak Samariang.

“Projek baka tu endang patut dipejalai ba sitak aku, udah datai maya kitai berandau mutarka penanggul rumah kelalu mar nyentuk mayuh raban biak enda ulih meli rumah kediri.

“Projek baka tu mega ulih mantu mutarka penanggul baka setinggan enggau ke bukai,” ku terang iya.

Hasidah madah, inisiatif kededua serikat nya ngena Sistem Berumah Industri (IBS) nya inisiatif ke engkeman ngambi nyaga kualiti rumah ulih dibeli baka Sri Pertiwi ti ulih tembu tumu nentuka pengempu rumah nadai lama nganti.

“Inisiatif nya engkeman amat lebuh projek rumah nembuka rumah tejanggal ketegal ungkus kereban berumah enggau gaji pengereja nambah.

“Pia mega, sistem tu ti dikena dalam sektor peribit ngujungka ekonomi nambah 35 peratus beberapa taun ke udah.
Iya madah, dikena mantu rayat ngembuan rumah kediri, Kepala Menteri Datuk Patinggi Abang Johari Tun Openg dalam bajet 2022 udah mantaika Skim Bantu Deposit Berumah enggau bantu belanja nyentuk RM10,000 ngagai pemeli rumah B40 enggau M40.

“Nya kebuah, aku ngarapka raban B40 enggau M40 deka ngerebut peluang tu ngembuan rumah kediri sereta ngelempung tating penusah sida kelebih agi maya pandemik Covid-19 tu,” ku Hasidah nerang.

Terang Hasidah, Malaysia mega nyendiaka mayuh skim berumah ulih dibeli baka Perumahan Rakyat Malaysia (PRIMA), Perumahan Penjawat Amam Malaysia (PPAM), Program Perumahan Rakyat (PPR) seraya Perintah Sarawak nyendiaka Skim Rumah Spektra, Skim Rumah Spektra Permata (RSP) enggau Sri Pertiwi.

Nangkan nya, Chairman Hornbill Networks Consortium Datuk Abdul Kadier Sahib madah, projek Samariang Avenue di baruh program Sri Pertiwi nya deka tembu ba timpuh 18 bulan dibanding ngelama tu pengelama 24 bulan laban ngena sistem IBS.

“Ssitem tu nentuka penguna enda lama nganti sereta nyendiaka rumah ti bisi kualiti,” ku iya.

Direktor Gerup Asteel Group Datuk Sri Victor Hii Lu Thian madah, sida enggau Hornbill Networks Consortium ngembuan tuju sebaka iya nya nyendiaka rumah ulih dibeli rayat Sarawak.

“Kualiti projek tu dikena ngurangka empas pengerusak rumah ba timpuh 10 taun.

“Berebak enggau nya, projek di Jalai Sultan Tengah tu deka nerima mayuh peminta lalu kami ngarapka ulih bejalaika mayuh agi projek baka tu dudi hari,” terang iya.

Projek nya mungkur 90 unit rumah baka 60 unit rumah seringkat enggau 28 unit rumah dua ringkat teres sereta dua buah rumah begembar seringkat baka nyungkur taba nya kenyau ari Ogos 2020 diatu benung ba renggat nirika tiang.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak