GPS endang lama udah nyikap diri napi PRN

KUCHING: Raban Gempung Parti Sarawak (GPS) dipeda udah besedia napi Pengawa Bepilih Besai Nengeri Ke-12 (PRN12) ti deka datai.

Menteri Dagang Temuai, Seni enggau Main Asal (Motac) ti mega Kaban Parlimen Sadong Jaya Datuk Seri Nancy Shukri madahka pengari parti nya mayuh ngatur program baka bantu, bantu nyeruri rumah enggau ngaga rumah baru ungkup rayat.

“Aku meda raban parti ari GPS endang lama udah nyikap diri laban kami seruran meda pengawa digaga sida.

“Taja pan (menua) agi mengkang ngemeranka Atur Pengawa Standard (SOP), kitai selalu meda sida ngatur kaul enggau rayat baikka nengah betemu mua tauka nengah chara online,” ku iya.

Nancy bejaku munyi nya ba aum media pengudah Bejadika Program Randau Sejarah Sarawak di sebuah hotel ditu, kemari.

Ku iya, endang amai semua projek ti dilanggur enda ulih tembu tekala nya tang sekeda projek benung digaga.

“Tu nunjukka raban GPS udah nyikap diri.

“Aku madah ari sukut GPS laban aku nemu enggau meda pengawa digaga sida.

“Sida ke bukai (parti bukai) engka bisi ngaga pengawa tang chara sida gawa engka enda sebaka,” ku iya.

Ku iya, pekara nya nyadi bekau ari misyen sesebengkah parti ti enda sebaka.

“Ba kami di GPS, kami deka terus meri servis ngagai rayat.

“Nya alai, kami ba Perintah Besai diatu, taja pan benung Aum Parlimen tetap datai ngabas rayat laban servis kitai endang ungkup rayat.

“Aku pechaya lebuh dikangau bediri dalam PRN, baikka orang (chalun) lama tauka baru aku ngarapka budaya meri servis ngagai rayat tu terus dibai dalam politik,” ku iya.

Suara Sarawak