Guna teknologi moden ngerembaika main asal

KUCHING: Nembiak rebak baru patut ngena pemansang enggau pengelandik teknologi moden kena belajar sereta ngerembaika leka main asal bansa Iban.

Sapit Kepala Menteri ti mega Menteri Betanam Betupi, Tanah Adat enggau Pemansang Kandang Menua Datuk Amar Douglas Uggah Embas madahka kitai Iban endang ngembuan mayuh macham leka main asal baka pantun, renung, beganu, bejawang ti mandangka orang tuai kelia ngembuan penemu enggau pengelandik nengkebang leka jaku.

“Enti kelia orang belelang ngagai menua jauh betaun-taun enti deka nuntut penemu, tang kemaya hari kitai ulih ngena teknologi bemacham aplikasyen ari internet baka Google Meet enggau webinar dikena belajarka leka main.

“Taja jauh ari pangan diri, pemansang teknologi penyambung ulih ngasuh kitai muntang betunga mua, berandau sereta betanya saut enggau pangan diri taja menua agi tebunsa ketegal Covid-19.

“Nya alai aku meransang nembiak baru ti landik ngena teknologi tau sama mantu ngetan ke main asal kitai nengah media rama ngambika bisi dipeda bansa kitai nyentuk ke jemah ila,” ku iya madah nyemetak.

Uggah madah munyi nya maya ngabas pengawa kelas belajarka leka main asal Iban kelima ti udah diatur Akademi Serakup Dayak Iban Sarawak (Asadia) malam ensana nengah Google Meet.

Berebak enggau nya mega, Uggah madahka gerempung ukai dikuasa perintah (NGO) ti ngerengkun ka main asal kitai bansa sama beguna ke pemansang teknologi pemadah kena ngangkat, ngidup sereta ngerembai ke main asal kitai bansa.

“Perintah nengeri endang ari kelia nyukung pengawa ngidup, ngetan enggau ngerembai ke main asal bansa kitai enggau semua bansa di Sarawak tu,” ku iya.

Malam nya mega, Uggah bisi ngemendarka agih belanja sepenyampau RM20,000 ngagai Asadia dikena terus ngerembaika main asal Iban nambahka agih belanja ti kala diberi iya empu sebedau tu sepenyampau RM12,000.

Berebak enggau nya, Uggah meri terima kasih ngagai pengajar main asal iya nya Nichol Ragai Lang, 85 ti sanggup ngajar rebak baru ngena teknologi moden dikena ngajar mensia mayuh ti rindu belajarka leka jaku Iban.

“Nya kebuah aku madah main asal tu ulih nyadi siti ari penatai pemisi menua lalu meri untung ngagai orang ti landik ba main asal kitai,” ku iya.

Asadia udah ngatur kelas leka main nengah aplikasyen Google Meet berengkah ari bulan Oktober tu tadi.

Suara Sarawak