Iban keterubah bulih PhD bidang antropologi

SIBU: Senator Robert Lau Hui Yew ngasaika pemidang niang Sapit Kepala Menteri, Tan Sri Datuk Amar Dr James Jemut Masing kena Hari Minggu tu tadi siti pengelenyau besai ngagai Sarawak kelebih agi komuniti Iban.

Lau madahka iya nemu pasal berita pemidang niang nengah siti artikel dalam online, pagi ensanus.

Ku iya, niang nya Iban keterubah ngembuan pelajar PhD (Kedoktoran Falsafah) dalam bidang antropologi (pansik pasal mensia).

“Ngelama tu, iya udah gawaka rayat iya enggau Sarawak.

“Iya (Masing) tu chunto ke chukup manah pasal pelajar laban chara iya ngemanah tikas idup rayat kelebih agi peranak menua pesisir ke ngembuan mimit peluang,” ku Lau nerang.

Ngelansa pasal kenang enggau niang, dia Lau madahka seduai bela ngembuan minat ke sebaka dalam sejarah.

Lau mega madah, lebuh nemuai ngagai sebuah gerija mit ba Sheepstor, England iya nya rumah James Brooke dalam taun 2017.

Dia iya meda Pua Kumbu digital ba dinding enggau penerang pasal pua kumbu pemeri ari niang.

Ku Lau, kepenudi seduai betemu nya niang datai ngagai Sibu bejadika Pengawa Nasih Tanah Projek Jalai Sungai Bidut-Nanga Tutus urung setaun ke udah.

“Kami berandau ba bot ba pejalai kin enggau lebuh pulai ari Nanga Tutus.

“Selamat jalai Tan Sri, belelak mih,” ku iya.

NYADIKA KENANG… Penerang pua kumbu diberi niang dipandang ba rumah James Brooke.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak