Inisiatif pemansang deka terus disambung

KUCHING: Gempung Parti Sarawak (GPS) deka terus bebendar neruska inisiatif pemansang nengeri tu awakka meri pengelantang ngagai rayat.

Sapit Kepala Menteri Datuk Amar Douglas Uggah madah, dikena ngemujurka juluk nya sukung ari rayat beguna amat awakka GPS ulih menang ba Pengawa Bepilih Besai Nengeri (PRN) ke-12.

“Nyema rayat terus nyukung GPS, agenda baru GPS mega deka digaga” ku Uggah maya Program Betemu enggau Kaban Parti Pesaka Bumiputera Bersatu (PBB) sitak Bukit Saban, ensana.

Kenu ku iya, GPS deka bertaika sektor sosioekonomi lebih agi ba menua pesisir nengah pengawa betanam betupi moden kelimpah ngemeratka pekara pelajar.

Pia mega, agenda tu betuju ngemanah perengkaguna telekomunikasyen ba menua pesisir.

Berebak enggau nya iya muji Kepala Menteri Sarawak Datuk Patinggi Abang Johari Tun Openg laban udah mayuh ngatur pemansang ba nengeri tu.

Nya alai, iya nangkan mensia mayuh bekaul enggau tagang ke deka dipejalai maya pengawa bepilih besai nengeri ila endang seriris enggau penyadi
pandemik Covid-19 ke bedau terenah.

Nangkan ke nya, iya madah pengundi ba Bukit Saban patut terus nyukung perintah ke deka bediri ba semua penuduk PRN.

Udah nya, Uggah ngabas pengawa ngemanah Sistem Entali Ai Tanjung Sebekut ke beungkus RM3.8 juta dikena meri pengelantang ngagai raban orang bumai ba sitak nya.

Suara Sarawak