Jematan Gantung Satok saksi pemansang Kuching – Petra Jaya

KUCHING: Jematan Gantung Satok deka nyadi ikon mengeri besai Kuching sereta ngerikod mayuh sejarah kelimpah ngemataka iya nyadi saksi pemansang ke digaga ba Mengeri Besai Kuching.

Kepala Menteri Datuk Patinggi Tan Sri Abang Johari Tun Openg madah, pemutus ngaga baru jematan nya ke digaga ba taun 1926 ari perintah Brooke, mandangka jematan nya udah ngemataka pemansang ari mengeri Kuching nyentuk ke Petra Jaya.

“Lebuh beratika pekara nya, iya digaga abru ungkup raban rebak dudi awakka sida nemu seharah baka ni Mengeri Kuching dikemansang naydi mengeri besai.

“Nya alai, perintah udah ngaga pemutus ngaga baru Jematan Gantung Satok enggau bejadika iya malam tu (ensana),” ku iya maya Bejadika Jematan Gantung Satok bepalan ba Medan Niaga Satok, apin lama ke udah.

Nerang silik, Abang Johari madah Charles Vyner Brooke ke nyadi Raja Putih Ketiga udah ngamatka juluk peranak Kuching mya nya nengah pengawa ngaga jematan gantung enggau ngupah arkitek tebilang Eropah, A.S Lowe iya nya menyadi C.P.Lowe (Direktor Opis Kereja Raya maya nya).

MANAH…Kepala Menteri Datuk Patinggi enggau bala bukai bela betempap jari kelai muji pemanah Jematan Gantung Satok ke udah dipasang enggau lampu LED maya bejadika Jematan Gantung Satok nya ba Medan Niaga Satok, ensana. -Gambar Ramidi Subari.

Pengawa ngaga jematan nya berengkah taun 1920 enggau ungkus AS$52,000, sereta tembu manah taun 1926.

“Jematan tu ukai semina dikena ngelayang sungai, tang mega nyadi kereban dikena mai batang paip ari Matang ke mengeri Kuching.

Jematan tu endang ngembuan mayuh sejarah lalu iya patut digaga baru dikena nyungkak ekonomi enggau matak temuai datai,”ku Abang Johari ke mega penyandang Dun Satok.

Berebak enggau nya, iya meri pengaga ati ngagai peranak Kuching laban udah bisi Gantung Satok ke sebaka enggau Golden Gate Bridge San Francisco, California ke ngundan sejarah ke chukup manah.

“Berekat pemujur tu, kitai deka diaku ba tikas dunya. Nya alai kitai patut nyaga mengeri besai tu.

“Nengah perintah ke likun enggau siru, nya deka mai Mengeri Besai Kuching tu terus dikemansang dibaruh perintah Gempung Parti Sarawak (GPS),” jelasnya.

Iya berebak enggau nya madah, Mengeri Besai Kuching diaku nyadi Mengeri Besai Kreatif ari Serakup Pelajar, Saintifik ketegal bejai Serakup Gempung Bansa (UNESCO) ba kategori gastronomi.

Ku iya, pengawa ngaku nya keterubah ba Malaysia lalu ba Kuching kitai keterubah bulih basa nya.
“Reti nya dunya ngaku mengeri besai Kuching enggau udah nya temuai ari serata dunya deka raun ke mengeri enggau nengeri tu.

Nangkan ke nya, nitihka penerang medai Opis Kereja Raya (JKR), projek replika jematan 213 meter pemanjai, buka tiga meter pemesai enggai tinggi 22 meter nya digaga ba taba lama enggau nitihka pelin lama.

“Jematan nya deka meri pemaik ngagai orang ke bejalai kaki ari Satok ke pasar baru di Medan Niaga Satok sereta udah dibuka baru ngagai mensia mayuh kena bulan Ogos tu tadi.

“Pia mega jematan pesaka nya udah dikemanah nengah masang lampu LED ba sepanjai jematan dikena ngisi pendiau moden ungkup ikon besejarah nya,” ku penerang JKR.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak