Julius Enchana chalun PBDSB di Dudong

KUCHING: Parti Bangsa Dayak Sarawak Baru (PBDSB) milih Julius Enchana Jaspher nyadi chalun ba sitak Dun Dudong dalam Pengawa Bepilih Besai Nengeri (PRN-12) ti deka datai.

Mandal Presiden PBDSB Rapelson Richard Hamit dalam siti penerang media madahka Julius ke beumur 33 taun siku peranak asal sitak Dudong iya nya ari Durin, Sibu dipilih nyadi chalun ba Dun nya ila.

“Julius siku orang dagang ti mujur enggau ngembuan setipikit Diploma ‘Process Plant Technology’ ari Universiti Curtin.

“Iya mega benung nampung pelajar dalam bidang Eksekutif ‘Master Industrial Engineering Technology’ (UMP),” ku iya.

Rapelson madah, Julius mega nyadi Tuai PBDSB Zon Tengah sereta nyadi Sekretari Komiti Nembiak PBDSB.

“Gerah tu udah digaga kenyau 2018 menya ari niang Cobbold John ba sebuah program randau di Rumah Naga Umping, Batu 6, Pasai Bon.

“Julius mega udah bulih pemendar ari Presiden PBDSB Bobby William sereta kaban supreme kaunsil PBDSB,” ku iya.

Iya nyemetak madahka Dun Dudong endang diempu PBDSB lalu udah sedia nyatup Parti Aspirasi Rakyat Sarawak (Aspirasi) ti sama deka ngerebut kerusi nya.

“Lina Soo (Aspirasi) patut anang ngelaban ‘bos’ lalu bebasaka pemutus Bobby ti nyadi Protem Presiden GASAK enggau Presiden PBDSB.

“PBDSB pechaya Julius siku nembiak ti berani bejaku sereta dikelala pengundi Dudong mai runding baru sereta pemansang baru kelimpah nyadi pengari nembiak Dayak dalam Kunsil Nengeri,” ku iya.

Suara Sarawak