Kami nyukung nadai belampung ati

SARATOK: Parti Pesaka Bumiputera Bersatu (PBB) Pampang Krian keranka Friday Belik dipilih nyadi chalun ngarika Parti Progresif Demokratik (PDP) enggau Gempung Perintah Sarawak (GPS) ba Sitak Kaunsil Nengeri Dun Krian ba Pengawa Bepilih Besai Nengeri Sarawak Ke-12 (PRN-12) tu.

Tuai Pemadah PBB Krian, Kaunselor Edmund Uda madahka baka ngelama tu, kami (PBB Krian) endang tetap meri sukung penuh ngagai sapa aja chalun ti ngarika GPS.

“Baka selama, PBB Krian tetap nyukung chalun ari GPS enggau nadai belampung ati.

“Tu berindik ari parti PBB ke endang nyadi tiang sukung perintah Sarawak ari jeman pegai Perintah Barisan Nasional (BN) sebedau betukar nama ngagai GPS diatu,” ku iya.

Edmund madah munyi nya maya nyempulang pejalai Friday Belik ke Rumah Robert Lin di Kedap, Melupa ditu, apin lama ke udah.

Ngelansa pasal penemu dipansutka Chairman PBB Krian ti mai terus negika Penyandang Dun Krian, Datuk Ali Biju ba PRN-12 tu ila, iya madah, penemu nya semina penemu iya (Tuai Pampang) kediri lalu ukai ngarika semua kaban parti.

“Penemu nya semina ngeruga runding urung 5,000 iku kaban PBB Krian.

“Kebuah pia, laban naka tu kami (PBB Krian) nadai udah baum bejuraika pekara nya,” ku iya.

Ba program ti sama, Tuai Pating PBB Melupa, Edward Jelani madahka semua kaban PBB Melupa mega sama nyukung Friday Belik nyema iya dipilih ngarika GPS ba PRN-12.

“PBB Pating Melupa diuluka aku udah selubang penemu deka nyukung Friday Belik ba PRN-12 tu,”ku iya.

Sama bisi datai Tukang Wang PBB Krian, Kaunselor Stephen Arin, Tuai Pemadah Nembiak PBB Krian, Dickson Ancharang, Kaunselor Soontik Changkan enggau ke bukai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak