Kayu RT-Paulownia deka ditanam ba laluh kampung puang

KUCHING: Industri nanam kayu RT- Paulownia bisi pengulih besai dikemansang ba Sarawak ungkup pemaik dudi hari, ku Direktor Kampung Sarawak (JHS) Datuk Hamden Mohammad.

Ku iya, Sarawak ngembuan 2.1 juta hektar puak kampung endur nanam pun kayu baru lalu diatu udah nyapai tagit nanam pun kayu ba tanah pemesai 540,000 hektar.

“Ari 540,000 hektar ti udah dikena nya, aku naka ulih nanam laluh kampung puang enggau pengawa nanam pun kayu RT- Paulownia ba puak kampung ke apin ditanam pun kayu,” terang iya.

Ku Hamden, iya mega deka meransang Pengempu Lisi Ladang Kampung (LPF) ba menua tu nyendiaka abis nadai 10 peratus ari tanah sida endur nanam pun kayu RT-Paulownia tu.

“Engka bisi sekeda pemar baka bekal benih laban naka diatu, TSJ aja bisi bahan ke manah ungkup pengawa nanam pun kayu tu.

“Kitai enda tau nanam pun kayu tu sebarang laban bisi 17 spesies ba dunya lalu siti ari nya diasil nengah Makmal Kultur Tisu RT Paulownia ti digaga TSG tu,” terang iya seraya madahka kualiti diasilka TSG nya endang dijamin.

Hamden mansutka jaku nya ngagai pemberita pengudah Pengawa Bejadika Makmal Kultur Tisu RT Paulownia ti dipenyadi Kepala Menteri Datuk Patinggi Tan Sri Abang Johari Tun Openg, ensana.

Ngelansa silik, iya madahka benih RT Paulownia ti diasilka TSG Green nya entara pun kayu pemadu jampat tumbuh di Sarawak naka diatu.

“Dua tiga taun ke udah, aku kakang ati pun kayu RT-Paulownia ditanam di Sarawak laban pun kayu tu semina suah ditanam ba Semenanjung Malaysia lalu engka enda engkeman enggau tanah kitai ba menua tu.

“Taja pia, kami meda pun kayu enggau tanah nya manah lalu ulih ditanam di Sarawak lalu pun kayu tu ngembuan mayuh pengulih,” terang iya.

Iya mega madah mayuh peminta pun kayu RT-Paulownia ari menua luar baka China enggau Jipun dikena ngaga rumah enggau kereban muzik.

Berebak enggau nya, iya madahka JHS naka ulih ngiga bansa utai tanah ti engkeman enggau jampat tumbuh baka pun kayu RT-Paulownia ngambi ditanam ditu.

Iya mega madah, pansik beguna amat ngambi nanam pun kayu baru ungkup industri enggau menua tu.

“Kami enggaika utai ke nyadi ngagai pun kayu Jati nyadi baru… kami kala mai ngagai Sarawak lalu mayuh orang rugi lebuh nanam pun kay utu.

“Kebuah pia laban pun kayu nya enda manah ditanam ba tanah Sarawak. Nya alai, pansik silik beguna amat ngambika pekara baka tu enda nyadi baru di menua tu,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak