Keingatka pemedis ngulihka menua merdeka

KUCHING: Raban bansa asal di Sarawak megai tanggungpengawa ti pemadu beguna dalam ngetanka menua lepas ari pegai orang luar.

Pengelicha Fakulti Sains Rama enggau Kemanusiaan Prof Dr Neilson Ilan Mersat madahka pekara tu nyemetak dipeda enda muntang dalam proses ngulihka enggau ngetanka Sarawak.

“Taja pan proses ngelepaska Sarawak ari genggam bansa bukai nadai bedarah, tang pejalai ngulihka merdeka nya penuh enggau darah.

“Pemar pemadu besai sida maya nya, baikka ba renggat luar tauka dalam menua endang pengawa subversif raban komunis,” ku iya.

Neilson bejaku munyi nya lebuh nyadi siku panel Program Randau Sejarah Sarawak di sebuah hotel ditu, kemari.

Ku iya, keruga komunis semina badu pengudah Sempekat 1990 ditanggam.

Iya mega ngelansa pemerani bujang berani Iban Tracker enggau Sarawak Renjer ti mantu menua Malaysia lebuh menua agi siga menya.

“Bulan Ogos 1948 sepenyampau 48 iku Iban Tracker nyereta tim pengelikun Malaya.

“Kelimpah ari nya, ba bulan Oktober 1948 bisi 170 tracker gawa di Malaya.

“Pia mega, ba bulan April 1949 urung 40 Iban Tracker datai di Malaya,” ku iya.

Ku iya, penyulut Iban Tracker dalam nyaga menua maya nya endang nadai banding.

“Maya tu, soldadu British agi biak datai kitu, sida enda teleba diau dalam kampung.

“Nya alai, Iban Tracker dikumbai tim pemadu kering laban sida bisi peneleba diau dalam kampung enggau landik nyidi munsuh.

“Entara bujang berani ti kala ngemegahka Sarawak iya nya Sarjan Datuk Awang Raweng penerima midul George Cross enggau ASP Menggong Panggit penerima midul George,” ku iya.

Iya madahka sejarah tu patut meruan dikeingat ngambika nembiak rebak baru tetap ingatka pemar lebuh menua bebendar ngulihka menua merdeka kelia.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak