Kepala Menteri enggai meda rayat pambar

JULAU: Kepala Menteri Datuk Patinggi Abang Johari Tun Openg sekali agi madahka iya enggai nerima parti politik ari luar tama ke Sarawak laban enggai meda rayat di nengeri tu pambar.

Kenu ku iya, penatai parti-parti politik ari luar semina deka ngajum rayat di nengeri tu lalu ngujungka laya.

“Di Sarawak, enda ngira bansa enggau ari ni penatai, kitai udah baka diri menyadi. Nyema kita ngachau orang Iban, orang Melayu enda lantang ati, baka nya mega udah nya.”

“Berebak enggau nya, orang Kristian ditu deka ngena leka jaku ‘Allah’, sida ulih ngena jalu nya laban nya kaul sida enggau Tuhan sida.”

“Di Semenanjung din, sida belaya ketegal produk ai bisa ke dikumbai ‘Timah’. Nama baka nya? Timah kebendar mai reti tin.”

“Enda baka ba Sarawak, kitai lantang. Nadai belaya enggau pangan diri.”

“Nya alai, kitai enggai orang luar masuk kitu laban semina orang Sarawak ulih nyaga kitai. Nadai orang bukai,” ku iya maya bejadika Pengawa Nasih Tanah Jematan Nangai Lasi di Julau, apin lama ke udah.

Nangkan ke nya, iya madah diri ngembuan siti prinsip idup enggau pechaya nyema kitai mantu orang bukai, Tuhan deka mantu kitai.

“Nya aja, nya kebuah aku enda nyadang diri ulih nyadi Kepala Menteri. Ba aku, politik aku enggai belaya, kitai deka mai ubah.

“Tambah ketuai mega seruran betukar, nya kebuah kitai benung nisih tuai baru lalu ngangkatka sida nyadi chalun baru awakka nyaup ngiring nengeri tu.

“Nya alai, orang biak anang berumban laban enti berumban, kita deka lemas. Tu mih chara kitai bejalaika pengawa nyengkaum negika hak nengeri nengah Sempekat Malaysia 1963 (MA63),” ku iya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak