MIRI: Peranak Kampung Damai Jaya, Senadin berasai lantang ati pengudah projek bekal ai beresi sepanjai 2.1 kilometer (km) udah tembu penuh.

Menteri Perengka Pengangkut Sarawak, Datuk Sri Lee Kim Shin madah, projek pengelama tiga bulan nya udah ditembu nitihka perambu ba bulan Ogos tu tadi enggau ungkus RM580,000 ari Perintah Sarawak.

“Sambung batang paip nya urung 2.1 km enggau projek tu deka meri pemaik ngagai 122 ruang bilik di Kampung Damai Jaya,” ku iya.

Kim Shin mansutka jaku nya lebuh bejadika sambung batang paip di Kampung Damai Jaya, Desa Senadin, Miri.

Projek nya udah diperambu Kim Shin ngambi nyikap bekal ai ngagai genturung pendiau nya ke suba nyadi sitak setinggan.

“Terima kasih ngagai LAKU Management Sdn Bhd laban udah bejalaika pengawa enggau lengkas baka ngelekat sambung paip ngagai genturung pendiau nya.

“Pengelengkas kita gawa nentuka peranak ba genturung pendiau tu udah disikap bekal ai beresi sama baka kandang menua bukai,” terang iya.

Nangkan nya, peranak dia, Kasau Dinggai enggau Jaya Nyambong ngarika peranak Kampung Damai meri besai terima kasih ngagai Kim Shin.

“Iya udah nulung genturung pendiau tu ukai semina disikap bekal ai beresi tang kami mega udah disikap bekal kuasa karan, jalai udah dibelakin enggau parit udah disemin.

“Besai amat jasa iya ke udah bebendar mantu kami lalu semua inisiatif nya endang ngasuh kami berasai lantang ati,” ku seduai ngenataika terima kasih ngagai Kim Shin.

Sama datai Pemangku Residen Bagi Menua Miri Jamalie Busri, Chairman LAKU Management Sdn Bhd, Datuk Nelson Balang Rining enggau Tuai Pegawai Eksekutif LAKU Management Sdn Bhd, Ts. Daneil Punang.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak