Mandat ari rayat udah abis

KUCHING: Kepala Menteri Datuk Patingging Abang Johari Tun Openg madah nyema nadai darurat, Dun ti kebendar patut padam kena 7 June 2021 nitihka Konstitusyen Nengeri Sarawak enggau kuasa merintah ti diberi rayat nengah mandat kenyau ari taun 2016 diatu udah nadai agi.

“Nya alai, dikena ngamatka semaya kami ngagai konstitusyen tu enggau nyaga hak rayat milih perintah sida empu, Gempung Parti Sarawak (GPS) ngasaika diri enda ngamatka sumpah nyema GPS enti terus megai perintah maya timpuh mandat diberi rayat udah abis,” ku iya.

Taja pia, iya madahka perintah seruran sedarka pekara pengerai enggau pengelikun rayat Sarawak patut dikemeratka.

Dulu ari nya, iya madah Tuai Pemegai Menua (TYT) Nengeri Sarawak udah ngenukuka Kunsil Nengeri (Dun) Sarawak tepadam kena 3 November tu tadi.

Iya madahka pekara tu dikenuku pengudah sida ngulihka lalau ari raban penerit adat enggau raban pengerai.

“Yang di-Pertuan Agong udah matak Proklamasyen Darurat pengudah betemu enggau TYT nitihka Pekara 21 (2) Konstitusyen Nengeri Sarawak nyengkaum Pekara 3 (3).

“Nya alai, dalam ngaga pemutus tu kami udah ngatur kaul enggau raban pengerai sereta raban penerit adat ngambika Pengawa Bepilih Besai Nengeri (PRN-12) ulih diatur nitihka Atur Pengawa Standard (SOP) nagang Covid-19 laban tikas meri vaksin Covid-19 udah nyapai tikas ti ulih diterima Komiti Besai Pengawa Bepilih (SPR) endur ngatur PRN,” ku iya.

Abang Johari bejaku munyi tu rambau Aum Media Khas ba Wisma Bapa Malaysia ditu, pagi tadi.

Ku iya, sebedau tu Yang di-Pertuan Agong ngenukuka Proklamasyen Darurat kena 11 Januari 2021 udah dipadam ba serata Malaysia, tang ungkup Sarawak darurat tu disambung berengkah 2 Ogos nyentuk 2 Februari 2022 laban beratika pekara pengerai mensia mayuh bekau pengerekai Covid-19.

Pemutus tu ku iya, digaga laban PRN Konstitusyen Nengeri patut diatur lebuh datai timpuh Dun padam kena 7 June 2021.

“Nitihka proklamasyen nya, pengudah darurat padam kena 2 Februari 2022, Dun mega deka padam lalu PRN mesti diatur dalam timpuh 60 hari.

“Pekara tu digaga ungkup mulaika hak demokrasyen rayat milih perintah sereta ngelindung atur demokrasyen parlimen.

“Taja pia, Seksyen 2(2) Ordinan Darurat (Kuasa-Kuasa Perlu) (Sarawak) 2021 (“Ordinan”) madahka atur Proklamasyen Darurat tu ulih dipadam tumu lepas disetuju Yang di-Pertuan Agong sepengudah iya betemu enggau TYT Nengeri Sarawak,” ku iya.

Iya madahka, lebuh sida dipilih megai perintah, sida udah besemaya deka nyaga, ngelindung enggau ngetanka Konstitusyen Nengeri Sarawak enggau Konstitusyen Perintah Besai.

“Atas semangat tu meh, kami berunding enggau TYT ngambika iya betemu enggau Yang di-Pertuan Agong matak Proklamasyen Darurat di baruh Seksyen 2(2) Ordinan Darurat,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak