Mark Awol enda nyadang diri ulih nyadi penanyi

Pengudah mujur ngeluarka lagu Pegi (Tusun 1), Mark Markglo Awol, 26, deka datai baru enggau lagu baru dikumbai Bepansa (Tusun 2).

Mark asal ari Niah madahka lagu Bepansa tu deka dikeluarka sebedau Hari Gawai taun baru (2022).

“Lagu Bepansa tu sambung kedua ari lagu Pegi ti udah ulih didinga mensia mayuh kenyau 30 September tu tadi.

“Nangkan lagu Bepansa, aku deka ngeluarka Tusun 3 (kepenudi) nangkan ke lagu tu iya nya lagu penutup ngagai kisah pengerindu ti dicheritaka aku dalam lagu nya,” ku iya lebuh dirandau Ruai Suara Sarawak, kemari.

Nangkan ke nya, anak ketiga ari empat iku diri menyadi tu madah, iya enda kala berunding ulih nyadi siku penanyi laban enda nyangka ulih ngaul diri dalam dunya pemerindang.

Mark benung belagu ba studio.

MURIH APAI

“Engka laban apai aku ti rindu belagu enggau nabuh muzik, nya kebuah pengawa nya lalu dititihka aku.

“Aku berengkah nyadaka lagu-lagu Iban orang bukai lalu dipasuka ba chanel youtube aku empu.

“Lagu solo keterubah aku digaga rindu ati aja laban aku deka ngemayuhka bala orang ti meda chanel youtube aku empu tang aku enda nyangka lagu nya ke udah mai tuah ngagai aku empu,” ku iya.

Ku Mark, ari lagu nya mega iya lalu bekelala enggau penengkebang lagu Kenny Subat enggau Barky Sagai nengah Facebook.

“Aku lalu nguji ngiga seduai iya sereta madahka diri deka ngaga lagu.

“Aku pan lalu dikangau nyereta projek ‘Kompilasyen Sada Pemerindang’ di baruh perabung Kumang Sangon Music Production begulai enggau bala penanyi bukai,” ku iya.

TEPANTUP ATI

Mark anak penakan Iban Bidayuh asal ari menua Niah, Miri.

Anak penakan Iban enggau Bidayuh tu mega madahka tepantup ati laban iya empu udah mujur ngaga lagu kediri.

“Sebedau tu aku semina nyadaka lagu orang bukai, tang diatu aku chukup berasai temegah laban udah mujur bisi lagu kediri.

“Berasai gaga mega ninga lagu aku ditebah ba radio enggau pelasar media rama ke bukai.

“Aku mega ulih bekelala enggau bala artis kitai Iban ti ngembuan peneleba sereta ulih bekunsi penemu tauka belajar ari sida,” ku iya.

Iya mega madahka, mayuh penau, peneleba enggau penemu dipejalar sekumbang udah nyadi siku penanyi.

“Taja pia, aku mega kala napi pemar lebuh lagu ti dipasukka aku ba chanel youtube nadai dipeda orang.

“Kala aku ngaga video lagu ti semina bepuluh iku aja ke meda.

“Tang pengeransing ati ti keran deka nyadi siku pemerindang aku nempuh semua penguji nya enggau manah,” ku iya.

Mark madahka, lagu Bepansa diatu benung dalam proses digaga lalu andalka nadai penanggul ti nekul.

“Ngarapka bala peminat terus nyukung penanyi baru sereta meretika lagu-lagu ti dikeluarka aku.

“Terima kasih mayuh ke sukung bala peminat ngelama tu nyengkaum kami sebilik, bakih enggau sida ke bukai ti enda ulih dirintaika aku,” ku iya.

Ngelansa sentang lagu Pegi ti baru dikeluarkan apin lama, Mark madahka lagu nya nyerita pasal siku lelaki ti asa ketegal sulu iya bisi orang bukai.

“Dalam lagu tu, lelaki nya baru nemu pangan iya bisi adong belalai (bisi pangan bukai) sekumbang seduai bepangan.

“Ba siti hari, baru iya nemu pangan iya bisi orang bukai, iya balat ringat nyentukka iya ngasuh indu nya pegi sereta anang pulai nikal ngagai iya agi,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak