Naroden sedia meri awak ngagai Abang Jo terus ngemansangka Gedong

GEDONG: Penyandang Dun Gedong, Datuk Mohd Naroden Majais sedia nyurutka diri enti Kepala Menteri Datuk Patinggi Tan Sri Abang Johari Tun Openg milih bediri ba konstitusyen nya maya Pengawa Bepilih Nengeri Ke-12 (PRN-12) ila.

Nya kebuah, iya ngelempaika pemutus nya ngagai Abang Johari ke mega Kepala Menteri enggau Chairman Gempung Parti Sarawak (GPS).

“Enti Kepala Menteri deka ke Gedong, aku endang otomatik nyurutka diri,” terang Naroden.

Naroden mansutka jaku nya ba aum pemberita pengudah Pengawa Nasih Tanah Jalai Lubok Teranggas ke Gedong enggau Pengawa Nyuaka Mediapads Ngagai Nembiak di Gedong enggau Simunjan ti dipenyadi Abang Johari di Balai Komuniti Gedong, tadi.

Lebuh bejaku, Naroden madahka iya sanggup meri peluang ngagai Abang Johari ngempu penuduk ti dimenang iya lebuh PRN-11.

Terang iya, tu nentuka Dun Gedong ukai semina terus mansang tang dekaka pemansang nya lengkas agi dipejalai ngambi ba timpuh pandak, empas pemansang deka mungkur ngagai kandang menua bukai baka Simunjan, Sebuyau nyengkaum Kota Samarahan.

“Sigi amat semua tu begunaka beguna kuasa ke besai agi, begunaka kuasa belanja, kuasa ngemendar enggau ke bukai.

“Semina Kepala Menteri aja bisi kuasa baka nya, nya kebuah aku sedia meri awak enti Kepala Menteri deka ngempu Dun Gedong maya PRN-12 tu ila,” ku Naroden.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak