Nyadi ketuai ukai muntang

KUCHING: Pelasar politik ungkup rayat patut dikemeran ngambika rayat ulih terus beserakup enggau ngembuan siku tuai ti manah.

Kepala Menteri Datuk Patinggi Tan Sri Abang Johari Tun Openg madahka pelasar tu mesti dipegai laban politik enda tau nyadi pekara diri empu aja (kediri).

“Enti bisi chalun baru ba palan kita peda dulu pendiau enggau pansik penerang pasal iya.

“Tu meh kebuah aku enggai meda orang luar (parti luar) tama, laban nyadi siku tuai ukai muntang,” ku iya.

Abang Johari bejaku munyi nya rambau Bejadika Program Nasih Tanah Jematan Sungai Sarawak, Sejingkat enggau Jalai Raya Kedua Kuching-Samarahan ba Jalai Bako ditu, apin lama ke udah.

Ku iya, nyadi siku tuai, orang nya patut dilatih awakka nyadi siku ti penyabar sereta manah.

“Sida ti biak patut dilatih, enti enda kita deka baka perau ulih karam nyema enda nitih alun gelumbang,” ku iya.

Iya madahka, penyerakup entara pekara ti pemadu beguna ngagai menua awakka perintah ulih ngatur pemansang menua enggau manah.

“Perintah Gempung Parti Sarawak (GPS) meri RM1,000 ngagai nembiak ti baru ada belanja ti disimpan dataika umur nembiak nya manggai 18 taun.

“Indai ti baru udah beranak diberi bantu RM450 sepengelama tiga bulan ungkup meli keresa dikena iya maya bepenti.

“Semua tu ulih digaga laban kita beserakup milih aku nyadi tuai,” ku iya.

Iya mega madahka pengerekai penyakit Covid-19 di menua tu entara pemar ti ditapi perintah ketegal tikas pengidup rayat kena pangka.

“Dagang nurun, orang enda ulih gawa lalu semua pengawa enggau aktiviti kitai tejanggal.

“Seninjik perintah ulih meri bantu bakul pemakai, bil api ai diberi diskaun, bantu ngagai raban pedaja enggau ke bukai beungkus RM5.3 billion.

“Semua nya ungkup rayat, laban aku nyadi tuai, aku deka ngiga berekat ke alai berekat nya datai ari kita,” ku iya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak