PBK mantaika 15 nama chalun

KUCHING: Parti Bumi Kenyalang (PBK) deka ngirai 15 chalun ti deka bediri ba sitak mengeri, semak mengeri enggau menua pesisir maya Pengawa Bepilih Nengeri Ke-12 (PRN-12) Sarawak tu ila.

Presiden iya, Voon Lee Shan madah, sida deka ngirai semua nama chalun ti udah dikenuku PBK berenggat bepanggai ba hari ke engkeman ila.

Voon mega madah, iya empu deka bediri ba sitak Batu Lintang.

“Enam agi sitak ba Bagi Menua Kuching iya nya Raymond Thong di Padungan, Teo Kuang Kim (Pending), Lue Cheng Hing (Kota Sentosa), Wong Tun Teck (Batu Kitang), Chai Kueh Khun (Batu Kawah) enggau Atet Dego (Stakan),” ku iya, tadi.

Ngelansa silik, iya madahka dua agi sitak apin diisi ba Bagi Menua Kuching iya nya Demak Laut enggau Samariang.

“Berebak enggau nya, kami minta chalun ti engkeman ngambi bediri di baruh parti kami ba dua sitak nya,” terang iya.

Nangkan nya ku iya, PBK ngirai Wan Chee Wan Mahjar di Sebuyau, Baha Iman (Lingga), Jackie Chiew (Beting Maro), Kasim Mana (Balai Ringin), Marcus Kayong (Bukit Begunan), Peli Aron (Simanggang), Stel Datu (Engkilili) enggau Usop Asun (Batang Ai) ungkup lapan penuduk di menua pesisir.

“Ungkup penuduk majoriti Bidayuh baka Opar, Tasik Biru, Tanjong Datu, Serembu, Mambong, Tarat, Tebedu, Kedup enggau Bukit Semuja, semua nya deka diisi raban porfesional baka ari raban sains, injinir enggau sida ti tinggi pelajar ti deka dibantai enda lama agi,” ku iya.

Kelimpah ari nya ku iya, PBK andalka PRN sekali tu enggau visyen ngulihka pengelepas enggau merdeka ungkup Sarawak ari perintah Besai Malaysia deka meri empas besai ngagai ubah gaya politik menua tu.

“Kami minta penyukung nyaup parti enggau chalun ba sebarang chara sereta ulih nyaup nyendiaka perengka pengangkut, staf enggau belanja ungkup pengawa bepilih,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak