Penemu betanam betupi moden patut dikunsi ngagai mensia mayuh

SERIAN: Perintah Sarawak seruran ngiga belanja dikena nyungkak sektor betanam betupi laban deka ngaga nengeri tu nyadi pengeksport (pengeluar) produk pemakai asil betanam betupi.

Menteri Muda Betanam Betupi, Tanah Adat enggau Pemansang Kandang Menua Datuk Dr Abdul Rahman Ismail madahka pengawa nya enda sengaja nambahka tikas ekonomi raban orang bekebun.

“Kitai deka nyapai juluk ati iya nya nyadi sebuah nengeri pengeluar produk pemakai manggai taun 2030.

“Kelimpah ari nya, kitai mega deka nentuka raban orang bumai ulih nambahka penatai pemisi pengabis nadai ngagai RM6,000 sebulan,” ku iya rambau Nangguhka Program Ngabas Komuniti Betanam Betupi (AgriCOP) ditu, ensana.

Ku iya, Sarawak mayuh ngimport asil pemakai ari menua luar baka Jipun, China enggau Taiwan ti nelan ungkus sepenyampau RM4 billion.

Ku iya pekara tu nyelai enggau enda masuk runding laban nengeri tu ngembuan tanah ti besai enggau manah ungkup pengawa betanam betupi.

Tandu iya baru, Sarawak nadai ngembuan musim enti dibanding enggau menua luar ti muntang napi penanghul ketegal musim berubah, tang sida ngeluarka mayuh agi asil banding enggau menua tu.

Nya alai, opis menteri enggau opis ti dikuasa sida mesti megai tanggungpengawa ngelakuka chara betanam betupi moden ngagai mensia mayuh.

“Kunsika penemu chara betanam betupi moden baka sistem fertigasyen dikena nambahka agi kualiti enggau kuantiti asil tanam ngagai mensia mayuh kelebih agi peranak menua pesisir.

“Ngena chara tu kitai ngarapka mensia mayuh beminat enggau teperansang betanam kelebih agi bala nembiak,” ku iya.

Iya madahka, tu nyadi pengawa besai dalam nentuka transformasyen dalam chara betanam betupi lama ngagai sistem baru ulih dipejalai enggau mujur.

Abdul Rahman ti mega penyandang Dun Bukit Kota mega madahka pengawa tu mega entara fokus Kepala Menteri Datuk Patinggi Tan Sri Abang Johari Tun Openg ti enda patut dipenyati.

Program AgriCOP ti diatur ba Rumah Panjai Kampung Krangan Jaya nya dibagi ngagai dua begian iya nya ngabas taba projek fertigasyen enggau palan penerang makit.

Program tu berengah pukul 8 pagi nyentuk pukul 4 lemai lalu ngembuan 180 peyerta ari lima buah kampung besemak.

Sama bisi dataai penyandang Dun Kedup Marten Ben.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak