Penguang andal ulih menang majoriti di Dun Marudi

SARATOK: Penyandang penuduk N.76 Dun Marudi, Dato Penguang Manggil ari Progresif Demokratik Parti (PDP) agi ngetanka penuduk iya ba sitak nya lalu andal deka bulih majoriti mayuh agi ari ke udah ba Pengawa Bepilih Besai Nengeri Ke-12 (PRN-12).

“Enti nadai penanggul sigi aku mih bediri dia, ngetanka penuduk ba N.76 Marudi maya PRN-12 tu ila.

“Taja pia, bepanggai ba orang diatas dedin, sebarang ku sida ngatur ga.

“Enti sida (ketuai) mikir ngelama tu aku udah ngereja pengawa manah ungkup rayat, sigi patut mih aku bediri dia.

“Tang ba aku siku, sigi nadai penanggul deka bediri lalu ngetanka penuduk aku di Marudi ba PRN-12 tu ila,” ku iya,” ku iya.

Menteri Muda Kaunsil Kandang Menua enggau Pengawa Berumah bejaku munyi nya ngagai pemberita pengudah tembu Program Pengari Begulai enggau Rayat ba Rumah Mang,Sungai Wong di Brayang ditu, ensana.

Lebuh ditanya penyampau peratus majoriti ulih menang iya madahka diri enda ulih nyebut enggau nyemetak sebarang penyampau tang nejuka pengundi ba Sitak N.76 Marudi nentuka sapa bagi chalun ti patut dipilih nyadika pengari sida ba sitak nya jemah.

“Enda ulih aku nyebut enggau nyentuk pasal majoriti nya tang, aku andal lalu asai-asai deka mayuh ari ke udah.

“Aku enggai nempa cherita taja bisi nyebut bulih tiga, lima enggau lapan ribu, laban awak ke rayat milih kediri empu lalu nentuka bagi sapa pengari ti patut dipilih sida maya nya ila (PRN-12),” ku iya.

Penguang mega madahka bisi lima iku chalun ari PDP udah diaku deka bediri ngarika parti nya ba PRN-12 tu ila iya nya ba sitak Krian, Ba Kelalan, Meluan, Tasik Biru nyengkaum ba sitak Marudi empu.

Suara Sarawak