Pengundi pintar, nemu sapa bagi patut diundi

PADAWAN: Penyandang Dun Mambong, Datuk Dr Jerip Susil madah diri andal pengundi ba sitak nya agi terus ngundi Gempung Parti Sarawak (GPS).

Iya madah, rayat ba Dun Mambong nemu saoa ke patut diundi ba Pengawa Bepilih Besai Nengeri (PRN) deka datai, laban suda nemu saoa ke mantu enggau kiruhka rayat.

“Pengundi pintar lalu sida nemu sapa ti patut diundi. Sida nemu saoa ke udah mantu sida ari sukut ekonomi enggau pemansang menua pesisir.

“Sida nemu sapa ke udah begulai enggau sida ngelama tu,” ku Jerip maya bejadika pengawa ngujak menira GPS Mambong ba Opis Palan Penyambung Parti Pesaka Bumiputera Bersatu (PBB) Mambong, Kota Padawan, kemari.

Jerip mega andal rayat deka ngaga pemutus pasal sapa ke patut diundi ke pemaik sida empu.

“Naka tu, Mambong bisi 19,000 pengundi. Kami melabaka urung 65 ngagai 75 peratus ari sida deka nurun ngundi.

“Nya alai titihka chara kitai empu bai rayat nurun ngundi ba hari muai undi ba nengeri tu, lalu aku ngarapka mayuh orang nurun ngundi,” ku iya.

Berebak enggau nya, Jerip madah tuju pengawa ngujak menira nya awakka mayuh orang ngelala parti nya.

Ku iya, pejalai sida betemu engagu mensia mayuh endang nitihka Atur Pengawa Standard (SOP) Covid-19.

“Kitai deka ngelawa semilan zon ba Mambong lalu ngujak menira GPS ba endur ke engkeman baka simpang jalai, genturung pendiau enggau endur bukai.

“Nengah pengawa tu mega, rayat nemu sapa GPS. Tang kami semina ulih betemu enggau sekeda orang aja laban nitika SOP, enggau nyaga pengelikun diri,” ku iya.

Pengawa nya berengkah ba Siburan A/B, Sta’ang, Bra’ang, Senah, Bengoh, Tebia, Emperoh, Skim Pengentap Baru Bengoh (BRS) enggau Benuk.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak