Perintah Besai mesti bebasaka hak Sabah, Sarawak dalam IGC

MIRI: Sarawak enggau Sabah mesti bisi pengari ba Kaunsil Asil Dalam Menua (Inland Revenue Board) baka dalam Perkara 24 Komiti Entara Perintah (IGC) lalu pekara tu mesti dipebasa Perintah Besai.

Kepala Menteri Datuk Patinggi Tan Sri Abang Johari Tun Openg nyemetak madah, Perintah Sarawak deka negika pekara nya nentuka Sarawak nerima asil penatai pemisi dalam menua.

“Pekara ti disemaya dalam IGC mesti dipebasa baka dalam Perkara 24 ti madahka mesti bisi pengari Sarawak enggau Sabah ba Kaunsil Asil Dalam Menua tang sampai sehari tu, nadai siku pen dichiri sekalika ari Sabah tauka Sarawak.

“Beduduk ari nya, Perintah Gempung Parti Sarawak (GPS) deka negika pekara tu laban semina sida dalam kaunsil nya ti nemu asil semua menua.

“Pengudah kitai nemu berapa asil ari Sarawak, reti iya kitai ulih minta sebagi ari penatai pemisi menua datai ari Sarawak nya ngambi dipulai… anang makai kediri,” ku iya.

Abang Johari mansutka jaku nya ba Pengerami Makai Lemai Tuai Begulai Enggau Rayat ba sebuah hotel tebilang, malam ensana.

Terang nya, nya pekara ke chukup besai guna deka ditegi seriris enggau semangat Sempekat Malaysia 1963 (MA63).

Nya kebuah, Chairman GPS nya begunaka mandat baru ari rayat maya Pengawa Bepilih Nengeri Ke-12 (PRN-12) ke deka datai.

“Pengudah beratika penyadi Covid-19 majak suman, nya kebuah aku minta pengawa bepilih diatur laban rayat mesti meri mandat baru ngagai GPS.

“Endang amat Yang di-Pertuan Agong meri kuasa (maya darurat) pengudah timpuh Dun padam ba bulan June tu tadi tang agi enggai ‘gagit’ nyadi Kepala Menteri nadai nerima mandat rayat.

“Lebuh nerima mandat baru ila, kami deka bisi kuasa ngemansangka Sarawak.

“Ba pekara tu, rayat mesti beratika pejalai GPS lalu baka ni gaya pemansang Sarawak ke diatu.

“Sarawak menua ti likun, rayat bebasaka pangan diri lalu nadai penyarut nyadi ketegal bebida penemu, pengarap enggau jalai pengidup.

“Kebuah pia laban kitai seperabung, siti rumah ngujungka kitai bebasak pangan diri laban semua kitai tu diri sebilik,” terang iya.

Abang Johari mega meri terima kasih ngagai rayat laban meri sukung tegut lebih empat taun megai Sarawak pengudah pemidang Tok Nan.

“Sama mega di Miri tu kitai ngembuan komuniti ti beserakup enggau bekerejasama lalu pekara tu mesti ditan ungkup anak uchu kitai jemah ila.

“Ari nya tadi, kitai meri pengandal ngagai serikat luar ditumbuh ditu baka Shell lalu nitihka penerang indu opis sida minta pulai ke Miri baru.

“Kebuah pia laban bisi ngandalka penegap lalu Perintah Sarawak ti manah enggau lebuh sida pulai, ekonomi Miri mega nambah,” terang Abang Johari.

Kelimpah ari nya, iya madahka Perintah Sarawak deka ngemansangka Miri ba bemacham pekara nyengkaum dagang temuai, perengka guna pemun baka jalai raya enggau ke bukai.

“Reti iya, Miri bisi pematak ungkup pemansang ekonomi laban komuniti Miri ditu seati,” ku iya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak