Perintah Sarawak enti dipegai PH enda tegap

KUCHING: Perintah Sarawak enda tegap enti dipegai Pakatan Harapan (PH), ku Kepala Menteri Datuk Patinggi Tan Sri Abang Johari Tun Openg.

Ku iya, pekara tu ulih dipeda nengah penyarut ke nyadi entara dua parti komponen PH iya nya Parti Keadilan Rakyat (PKR) enggau Parti Tindakan Demokratik (DAP) maya napi Pengawa Bepilih Nengeri Ke-12 (PRN-12) tu.

“Rayat ulih meda sebedau haribulan pengawa bepilih dipadah sida udah charut.

“Enti pekara tu nyadi, reti iya perintah deka enda tegap,” ku iya nyemetak madah.

Abang Johari mansutka jaku nya lebuh dirandau pengudah bejadika Pengawa Ngelancharka Tim GPS ba Indu Opis Parti Pesaka Bumiputera Bersatu (PBB), ditu ensana.

TIM GPS…Presiden GPS, Tan Sri Abang Johari Tun Openg enggau bala tuai parti kompenan Parti GPS iya nya Datuk Seri Tiong King Sing (PDP), Datuk Seri Joseph Salang Gandum (PRS), Datuk Seri Dr. Sim Kui Hian (SUPP) enggau Datuk Amar Douglas Uggah Embas (PBB) sereta bala bukai bela ngangkatka jari kelai seati rambau bejadika Tim GPS ba Indu Opis PBB,, Jalai Bako, Kuching.-
GAMBAR GHAZALI BUJANG

Ku Abang Johari ke mega Chairman Gempung Parti Sarawak (GPS), iya sigi lama nemu raban penyakal deka napi penanggul nyengkaum parti ari Sarawak.

Terang iya, pekara tu ulih dipeda ari rikod perintah PH lebuh megai menua.

Penyarut entara PKR enggau DAP Sarawak nyadi lebuh DAP dipadah bulaka pemutus aum ngambi isu bebagika penuduk entara tiga parti dalam PH Sarawak dibai enggau diberunding dalam Kaunsil Besai PH.

Tu beduduk ari ulah Chairman DAP Sarawak, Chong Chieng Jen mantaika rintai chalun DAP ungkup 18 sitak ke alai empat ari nya matak perati PKR iya nya Dun Kemena, Senadin, Pujut enggau Piasau.

Nya kebuah, pemangku Chairman PKR Sarawak, Abang Zulkifli Abang Engkeh madah, enti sida puntan selubang penemu maya maya hari nganjung nama, dua parti penyakal ke bepengkalan ari Semenanjung nya dipelaba deka besatup enggau pangan diri.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak