PRN12: PBB Pantai Damai udah masuk ‘gear lima’

KUCHING: Tim Parti Pesaka Bumiputera Bersatu (PBB) Pampang Pantai Damai udah masuk ‘gear lima’ napi Pengawa Bepilih Nengeri Ke-12 (PRN12).

Mandal Presiden PBB Datuk Dr Abdul Rahman Junaidi madah, PRN-12 deka bisi bida dibanding sebedau tu laban bisi ubah ari sukut Atur Pengawa Standard (SOP).

Ku iya, pengundi mega engka irau nurun ngundi laban pandemik Covid-19 agi ngerekai ba selampur menua.

“Taja kitai udah sedia penuh tang mesti nentuka genap pengundi nurun ngundi.

“Kitai mega mesti nentuka pengundi enda irau ati sereta meri penerang ke patut pasal pengawa ngundi nitihka SOP ti terit,” ku iya nerang.

Dr Abdul Rahman ke mega Tuai PBB Pampang Pantai Damai madah, genap tim ba renggat atas, raban indu enggau nembiak mesti beserakup sereta ngulihka tiap penerang baru pasal pengawa ngundi ke deka datai.

“Kitai mesti nemu setiap penerang pemadu baru nyengkaum pasal SOP PRN-12,” terang iya.

Nambahka nya ku iya, tim mega mesti nentuka genap pengundi ulih nitihka SOP ditetapka Komiti Besai Pengawa Bepilih (SPR).

“Tu keterubah iya SOP baru dikena ungkup pengawa bepilih ketegal pengerekai Covid-19.

“Ukai semina nya aja, tu mega pengawa bepilih keterubah di Sarawak ti diatur maya pandemik,” terang iya.
Dr Abdul Rahman mega merambu ngagai SPR nambahka penyampau palan enggau ngelanjar timpuh ngundi.

“Pekara tu beguna amat ungkup pengelantang pengundi sereta nyeliahka palan ngundi nya sekut,” ku iya nerang.

Lebuh Pengawa Bepilih Nengeri Ke-11 (PRN-11), Abdul Rahman menang enggau majoriti 9,260 undi ngalahka Zainal Abidin Yet.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak