Program Think & Thinker narak nembiak ba penemu teknologi

SARIKEI: Program Think & Thinker (T&T) ti dipejalai nengah Tabung Ekonomi Gagasan Anak Sarawak (Tegas) nya pelasar besai ungkup narak raban nembiak mantaika penau sereta pengelandik sida ba penemu inovasyen digital enggau teknologi.

Menteri Muda Perambu Mengeri, Pengatur Tanah enggau Rampa Menua, Datuk Len Talif Salleh madah, ‘Think’ nya mai reti berunding seraya ‘Thinker’ nya baru reti ngubah sekeda utai.

Nya kebuah ku iya, makmal mini T&T nya endur bala nembiak berunding lalu nengkebang inovasyen ngambi nyadi nyata.

“Nengah penumbuh Makmal Mini T&T, pakar industri mega ulih bekunsika penemu enggau pengelandik sida bekaul teknologi enggau digital begulai enggau nembiak, pengajar enggau komuniti.

“Ari nya tadi, kitai ulih nempa nembiak ti pintar ba penemu inovasyen digital enggau teknologi.

“Pemansang teknologi enggau digital nya polisi ke besai bendar reti ngambi kitai ulih nyapai juluk nyadi menua maju di Malaysia ba taun 2030,” terang iya.

Len Talif mansutka jaku nya lebuh bejadika Makmal Mini T&T, kemari.

Ku iya, menua maju baka China, Amerika Syarikat enggau Jipun endang ngemeratka pemansang teknologi enggau digital dalam sektor besai.

Iya madah baru, inisiatif nya nentuka ekonomi menua terus tegap enggau ulih besemekih sereta nambahka penguntung.

Beduduk ari nya ku iya, nya kebuah menua tu amat ngemeratka pekara pelajar bekaul teknologi enggau digital ari tikas sekula dikena nyapai pemujur.

“Nya alai, kitai mega mesti nyikap nembiak enggau penemu digital enggau teknologi bepun ari tikas sekula nentuka sida sedia enggau revolusyen industri.

“Pekara tu seriris enggau juluk Perintah Sarawak dekaka rayat Sarawak pintar digital enggau teknologi nentuka agenda ekonomi digital nyadi pemansut ba menua tu ulih dijapai,” terang iya.

Len Talif mega andalka Makmal Mini T&T ulih nembiak nembiak ti kreatif, inovatif enggau inventif kelimpah diajar enggau pengelandik Programming enggau Coding.

Nambahka nya ku iya, program tu mega nentuka nembiak ulih nengkebang aplikasyen kediri ti meri peluang ngagai sida nyerungkai bemacham bidang nyengkaum pengawa betanam betupi enggau dagang temuai.

“Engka ila sida ulih nengkebang aplikasyen ti ulih nyidi pengami tanah enggau bansa utai tanam ke manah ditanam ba tanah nya ngambi ulih nambahka asil pengawa betanam betupi.

“Tambah mega, engka aplikasyen enggau teknologi nya ulih matau sistem entali ai enggau pengawa meri sum ngagai utai tanam nitihka pematut,” terang iya baru.

Nangkan nya ku iya, Makmal Mini T&T mega meri peneleba enggau penemu ngagai nembiak pasal robotik enggau dron.

Ku iya, pengawa bekenaka dron tu besai guna dalam sektor besai menua dikena nambahka pemansut ngambi nangkup peminta makit.

“Ambika chunto, tebal agi sektor otomotif dikereja robot. Sama mega ba sektor betanam betupi lebuh dron nya nyadi altenatif meri sum enggau nyembur indu utai ba utai tanam.

“Nengah modul belajar ti udah disediaka Makmal Mini T&T Mini Lab, aku andal enggau pechaya kitai ulih nempa pakar teknologi enggau digital ari raban nembiak ba menua tu empu dudi hari,” terang iya.

Suara Sarawak