Projek deka digaga ukai ketegal PRN

KUCHING: Projek pemansang ti deka digaga perintahungkup peranak menua tu ukai ketegal Pengawa Bepilih Besai Nengeri (PRN-12) udah semak.

Menteri Muda Infrastruktur enggau Pemansang Penyangkai Kapal Datuk Julaihi Narawi madahka projek pemansang ti dibai perintah tu udah dilanggur dulu ba timpuh ti panjai.

“Projek tu, projek timpuh panjai ti dilanggur lalu enda sengaja pengawa bejadika projek nyadi lebuh timpuh PRN-12 deka datai.

“Nadai ayan isu kami ngaga pengawa jam diatu laban kami endang seruran bekereja enda ngira lebuh pengawa bepilih tauka pengudah pengawa bepilih,” ku iya.

Julaihi bejaku munyi nya rambau Program Nasih Tanah Projek Jalai Akses Selatan Palan Penerebai Bilun Entarabansa Kuching enggau Program Nyuaka Setipikit Kunteriktor Penembu Renggat Empat 2021 ditu, ensana.

Ku iya, pekara pemansang terus dipejalaika laban nya agenda pemansang timpuh panjai.

“Program nasih tanah tu ukai nunjukka kelai kitai deka PRN tauka enda.

“Nya alai, kitai patut meri kredit ngagai Perintah Sarawak enggau Perintah Besai laban bebendar ngemanahka aksesbiliti enda ngira di mengeri, menua pesisir tauka di endur bukai,” ku iya.

Mulaika pengingat lebuh agi dibaruh Perintah Pakatan Harapan (PH) sepengelama 22 bulan, penyandang Dun Sebuyau nya madahka iya kala minta agih tambah ngagai perintah maya nya tang enda mujur.

“Aku pechaya ba baruh Menteri KKR (Fadillah), kitai sama ulih bulih projek bukai ungkup Sarawak,” ku iya.

Ngelansa projek ngaga jalai akses ba Selatan Palan Penerebai Bilun Entarabansa Kuching kemari, Julaihi madahka jalai tu endang jalai ti dianti peranak kandang menua nya.

“Projek tu deka nambahka aksesbiliti peranak besemak laban jalai ari Samarahan ke Kuching suah sekut.

“Jalai baru tu ila deka ngaul pelilih Muara Tuang, Kota Samarahan, Kampung Sungai Tapang enggau Stutong.

“Nya deka ngasuh pejalai kitai ngagai palan tu jampat agi kelimpah ngasuh pejalai trafik sekut ulih dikurangka,” ku iya.

Julaihi andalka jalai baru tu ila mega ulih muka palan berumah ti baru sereta ngemanahka sektor ekonomi ngagai peranak ti besemak palan nya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak