Rebak baru patut pechayaka perintah

KUCHING: Nembiak rebak baru ba menua tu diperansang terus tegap enggau pechayaka ngagai Perintah Gempung Parti Sarawak (GPS).

Kepala Menteri Datuk Patinggi Abang Johari Tun Openg madah, perintah iya ngembuan tuju ti nyata lebuh bejalaika bemacham inisiatif nyengkaum nyendiaka infrastruktur ekonomi digital ungkup pemansang menua tu.

“Aku ngarapka raban nembiak sedarka pekara ti udah dipejalaika perintah laban diatu jeman baru, jeman digital.

“Aku mesti madah ngagai kita Sarawak tu ukai enda mansang tang kitai manah agi ari selampur Malaysia ari sukut ekonomi digital.

“Tu mih pengawa ti udah dikemansang kami, anang masau pemansang menua, kitai mesti bisi perintah ti jauh timpai.

“Tambah mega, inisiatif ekonomi digital tu ungkup raban nembiak.

Nya kebuah iarka penanggul enggau isu mit lalu terus kemansangka pengawa ti dipejalai kitai,” ku iya.

Abang Johari mansutka jaku nya ba Pengawa Ngelancharka Aplikasyen dBazzar di Wisma Bapa Malaysia, tadi.

Ngelansa pasal aplikasyen e-dagang dBazzar nya, Abang Johari madahka nya bukti Perintah Sarawak ngemansangka inisiatif ekonomi digital Sarawak lebuh nyendiaka bemacham pekara ungkup pemansang rayat.

“Ba taun 2017, aku udah ngelancharka inisiatif ekonomi digital, lebuh nya Sarawak agi tinggal ba pengawa bekenaka teknologi.

“Nya alai, kitai mesti bisi infrastruktur ti manah. Diatu jeman internet 5G ukai 3G agi.

“Reti iya tadi, peneras internet mesti bisi lalu tu bidang ke benung diperati Perintah Sarawak,” terang Abang Johari.

Dulu ari nya, Abang Johari madahka Perintah Sarawak benung nyambung Sarawak enggau hab entarabansa nentuka servis nganjung produk menua rembus ngagai makit dunya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak