Rh. Tengak, Basi Ili kena ampuh bah

ENGKILILI: Sekeda rumah panjai di pelilih Engkilili kena tuntung penusah ampuh bah pagi tadi.

Ba Rumah Tengak, Basi Ili dipadahka bisi 20 pintu peranak rumah panjai nya kena bah nyengkaum 14 pintu betampung enggau enam pintu rumah nyembuah, semina dua pintu ke nyembuah aja enda kena bah.

Siku peranak rumah panjai nya, Jospeh Andrew Geraik, 51, madah ai terubah ditemu tama rumah urung pukul 9.30 pagi tadi dipeda anak iya empu lebuh ke benung mandi.

“Rumah panjai kami tu tak ninting ujung taun kena bah lebih enti maya musin landas.

Rumah Tengak, Basi Ili di Engkilii.

“Nya alai, kami minta raban bekaul Opis Parit enggau Entali Ai (DID) lengkas ngaduka sapat bah ba tebing sungai semak rumah panjai tu.

“Parit besai bisi udah digaga ngelinggi rumah panjai tu tang mih pengawa nya bedau ulih mutarka penanggul ke suah nuntung kami serumah,” ku iya madah ngagai Ruai Suara Sarawak.

Nangkan ke nya, ku Joseph tikas penalam ai maya berita tu ditulis tunga ke mua rumah panjai sida bisi sekaki setengah penalam lalu tungga ke belakang rumah lebih tiga kaki.

Berebak enggau nya, rumah panjai bukai ke bela dipadahka kena bah iya nya Rumah Maria, Merebong, rumah panjai Langkang Ili, rumah panjai Lidong enggau jalai ngelawa Rumah Dennis @ Kuyu, Ensurai ulu ke mega enda alah tengah kereban pengangkut darat ke baruh ketegal ampuh bah.

 

Rumah Maria, Merebong di Engkilili.

 

Jalai ngelawa Rumah Dennis @ Kuyu, Ensurai Ulu benung ampuh.

 

Rumah panjai Lidong di Engkilili.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak