RM465 juta udah dikena ngemansang Bukit Saban

SPAOH: Lebih RM465 juta udah enggau deka dikena ngemansangka sitak Dun Bukit Saban kenyau ari taun 2017.

Nya mih jaku dikenatai Sapit Kepala Menteri ke mega Adun Bukit Saban, Datuk Amar Douglas Uggah Embas.

Tang ku iya, bisi raban bukai madahka sitak majoriti Iban nya ngembuan mimit aja pemansang.

“Aku deka nanya tauka sekalika sida enda sedarka pemansang ti disediaka Perintah Gempung Parti Sarawak (GPS)?

“Tunjukka bukti pasal Dun Bukit Saban ngembuan mimit aja pemansang sekumbang aku nyadi pengari dia,” ku Uggah.

Uggah mansutka ba Penerami Ketuai Begulai Enggau Rayat Bukit Saban ti diatur ba Balai Komuniti Spaoh, ensanus.

Sama datai Menteri Muda ba Opis Kepala Menteri (Undang-Undang, Kaul Perintah Sarawak-Perintah Besai enggau Matau Projek) Datuk Sharifah Hasidah Sayeed Aman Ghazali, Sekretari Politik Kepala Menteri Dr Richard Rapu enggau sekretari Politik Kepala Menteri, Dayang Norlizawati Abang Abdul Karim.

Menteri Wang Kedua nya mega madah, kenyau ari taun 2017, lebih RM465 juta udah enggau deka dikena ba sitak Dun Bukit Saban ngambi nyendiaka bemacham infrastruktur, perengka guna rama, genturung pendiau, projek betanam betupi moden enggau ke bukai.

“Rayat di Bukit Saban enggau Spaoh udah meda pemansang majak nambah diatu.

“Kebuah pia laban sida milih pemutus ke betul begulai enggau perintah.

“Aku andal rayat sekali agi deka ngaga pilih ke sebaka maya Pengawa Bepilih Nengeri Ke-12 (PRN-12) ke deka datai,” ku Uggah.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak