Sapat sungai digaga ari Kpg Tanjung nyentuk ke Kpg Sungai Bedil

KUCHING: Sapat tebing sungai (waterfront) ba Kampung Melayu Seberang Ulu (betunga enggau Waterfront Kuching) diperati ulih nyungkak ekonomi raban pemenggi perau tambang enggau sektor dagang temuai.

Kepala Menteri Datuk Patinggi Tan Sri Abang Johari Tun Openg madahka waterfront nya digaga berengkah ari Kampung Lintang ngagai Kampung Tanjung enggau ari Kampung Lintang ngagai Sungai Bedil.

“Kitai deka nambah siti agi renggat iya nya renggat kedua ari Kampung Tanjung ngagai Kampung Tupong Tengah.

“Reti iya, semua genturung sepiak tu deka bisi sapat nagang tanah tusur sereta ngemanahka palan ditu,” ku iya.

Abang Johari bejaku munyi nya lebuh ditanya media pengudah ngabas projek kereja di Kampung Lintang ditu, kemari.

Ku iya, renggat ketiga udah nya ila, perintah deka ngemansangka pengakalan di Kampung Lintang ti dipelaba nelan ungkus belanja RM3.5 juta.

“Perengkaguna ti deka disikap ditu iya nya jeti enggau perengkaguna dikena orang bemain jet ski.

“Aku meda tu siti ari pekara ti narit ati bala temuai lebuh datai ngagai mengeri Kuching.

“Kebuah pia, laban di mua palan tu bisi Dock Yard ke benung dalam proses ngaga brau, lebuh udah tembu ila rampa menua ditu manah dipeda,” ku iya.

Iya mega nyemetak madahka rumah dampih palan nya nadai dikachau laban benteng ti digaga nya nungga sungai.

Ku Abang Johari naka diatu, mayuh udah projek waterfront udah digaga ba Sarawak nyengkaum di Lubok Antu, Kapit, Dalat, Limbang, Belaga enggau Lawas.

“Kitai ngemanahka tebing sungai laban lebuh dipeda ari seberai nyin palan ditu manah, ditu pan lebuh kitai meda kin manah.

“Kapal Cruise ulih mansa ari Waterfront Kuching nyentuk ke Satok din, tambah mega ba din bisi Jematan Satok.

“Baru rega penambang kitai ulih niki, orang rindu raun kitu lalu tepaut ati meda pemanah rampa menua ditu,” ku iya.

Iya madahka projek tu dipelaba tembu ujung taun baru tu ila.

“Ke bukai udah nyau deka tembu, semina tinggal ngaga pengkalan ditu agi ngambi awak dalam 24 bulan ku sida.

“Palan tu deka manah sereta narit ati bala temuai ila kelebih agi kitai ngembuan mayuh pemakai tradisional ditu,” ku iya.

PROJEK SAPAT TEBING SUNGAI….Abang Johari (tiga kanan) ngabas projek kereja di Kampung Lintang ditu, kemari. Sama bisi dipeda Menteri Muda ba Opis Kepala Menteri (Undang-undang, Kaul Sarawak enggau Perintah Besai sereta Matau Projek) Datuk Sharifah Hasidah Sayeed Aman Ghazali (kanan).
Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak