Semilan nama chalun PBDSB ungkup PRN12

SIMANGGANG: Parti Bansa Dayak Sarawak Baru (PBDSB) udah mantaika semilan nama chalun ari parti nya ti deka bediri ba Pengawa Bepilih Besai (PRN) Ke-12.

Presiden iya, Bobby William udah mantaika semua nama chalun nya ba aum pemberita ke diatur pengudah Aum PBDSB begulai enggau chalun N31 Bukit Begunan kena 1 November tu tadi.

Ku iya, entara chalun PBDSB tu iya nya Superitenden (B) Entusa Iman deka bediri ba sitak Dun Bukit Begunan, Leo Bunsu (Ngemah), Sai Malaka (Katibas) enggau Robert Saweng (Bukit Goram).

Udah nya, Kenneth Adan Silek ba Murum, Baba Emperam (Samalaju), Ignatius Jushef Bunsuan (Batu Danau), Lingga Atok (Gedong) enggau Sapit Presiden PBDSB Mejar (B) Moses Ripai (Pelagus).

Berebak enggau nya, Bobby madah kebendar PBDSB bisi ati deka bediri ba 38 penuduk DUN ke majoriti pengundi Dayak.

“Naka tu kami udah ngelala 11 iku chalun lalu semilan iku ari sida udah dibantu tumu ungkup PRN tu,” ku .
Nangkan ke nya, iya madah agenda besai PBDSB deka negika hak bansa Dayak aja.

“Nya alai, kami nesau bala pengundi Dayak meri peluang ngagai kami negika hak sida sepanjai maya,” ku Bobby.

Ungkup penemu, PBDSB ditumbuh 2013 sereta diiring Presiden keterubah iya nya Louis Jarau Patrick sebedau ditukar Cobbold John Lusoi. Niang Cobblod midang kena Mach 2019 ketegal sakit tunggul ati ba rumah iya di Kuala Lumpur.

Udah nya, penuduk Presiden disambung Bobby nyentuk ke diatu.

Suara Sarawak