SOP nadai bida ungkup semua parti

KUCHING: Atur Pengawa Standard (SOP) enggau undang-undang ungkup Pengawa Bepilih Besai Nengeri (PRN-12) ngagai Gempung Parti Sarawak enggau parti penyakal nadai bisi bida.

Penyandang Dun Asajaya Datuk Seri Abdul Karim Rahman Hamzah madahka Komiti Besai Pengawa Bepilih (SPR) nadai meri dua set SOP ti bebida ungkup GPS tauka parti penyakal.

“Iya (Chairman DAP Sarawak Chong Chieng Jen) madahka SOP ti diteritka nya baka ti meri pemar ngagai penyakal.

“SOP ti udah ditetapka ngagai GPS mega sama ungkup raban penyakal, nadai bida,” ku iya.

Iya bejaku munyi nya lebuh ditanya pemberita pengudah bejadika Sarawak Adventure Challenge (SAC) renggat kelima di Siniawan, Bau kemari.

Pekara tu dilansa bekau ari penerang Chieng Jen kena 6 November tu tadi, ti madahka PRN sekali tu dikumbai nadai adil.

Menteri Dagang Temuai, Seni enggau Main Asal nya madahka, taja pan SOP tu bedau dipansutka tang enti meda gaya PRN di Melaka, Opis Menteri Pengerai (KKM) udah netapka sekeda SOP ti dipelabaka deka dikena ba PRN Sarawak.

“Entara SOP tu, iya nya enda ulih bekimpin ari sebuah rumah ngagai sebuah rumah enggau enda ulih begelumu.

“Tu ti ngasuh Chieng Jen ngeluarka penerang baka nya, ngumbai kaki kami kena tanchang, jari kami kena tanchang enggau pengawa bepilih tu nadai adil,” ku iya.

Iya nandu, penerang Cheng Jen nya baka ti madahka SOP tu semina ungkup sida aja.

“Kami pan enda ulih, kami mega nadai bulih ruang baka nya bekimpin enggau diatu kami benung ngiga chara deka bekaul enggau raban pengundi di sitak kami empu,” ku iya.

Suara Sarawak