SUPP agi ngirai tujuh penyandang Dun

MIRI: Tujuh penyandang Kunsil Nengeri (Dun) ari Parti Sa’ati Rayat Sarawak (SUPP) deka dikirai baru ngetanka penuduk diri ba Pengawa Bepilih Besai Nengeri Ke-12 (PRN12) tu ila.

Pekara nya dipansutka Sekretari Besai SUPP, Datuk Sebastian Ting seraya madahka nama chalun nya deka dianjung ngagai Chairman Gempung Parti Sarawak (GPS) Datuk Patinggi Abang Johari Tun Openg.

“SUPP udah ngaga pemutus iya nya semua penyandang ke menang ba Pengawa Bepilih Besai Nengeri Ke-11 ‘disabung’ baru bediri ba PRN ti deka datai,”ku iya madah ngagai pemberita pengudah bejadika Batik Linut ba ditu, ensana.

Kelimpag ari Ting empu ti deka bediri ba sitak Dun Piasau, enam agi sitak bukai iya nya Presiden SUPP Datuk Seri Dr Sim Kui Hian deka bediri ba Batu Kawa, Mandal Presiden Datuk Seri Lee Kim Shin (Senadin), Datuk Ding Kuong Hing (Meradong), Datuk Seri Huang Tiong Sii (Repuk), Datuk Francis Harden Hollis (Simanggang) enggau Ko Khere Chiang (Batu Kitgang).

GPS diarikan Parti Pesaka Bumiputera Bersatu (PBB), Parti Rayat Sarawak (PRS), SUPP enggau Parti Demokratik Progresif (PDP).

Sebedau tu, Sekretari GPS Datuk Seri Alexander Nanta Linggi madahka sida deka bediri ba semua 82 penuduk ba PRN deka datai.

Ari penyampau kerusi nya, SUPP diagihka 20 penuduk lalu semua chalun endang udah sedia semina nganti haribulan bepilih ti deka ditentuka Komiti Pengawa Bepilih Besai (SPR).

Suara Sarawak