SUPP nganjung 20 iku nama chalun ungkup PRN12

KUCHING: Parti Sa’ati Rayat Sarawak (SUPP) udah nganjung 20 rintai nama chalun disadang deka bediri ngarika parti nya dalam Pengawa Bepilih Besai Nengeri (PRN-12) ti deka datai.

Presiden SUPP Datuk Seri Prof Sim Kui Hian madah rintai nama ke dianjung nya endang nitihka penuduk asal SUPP baka ngelama tu.

“Aku udah nganjung rintai nama (chalun) tu ngagai Chairman Gempung Parti Sarawak (GPS) – Datuk Patinggi Abang Johari Tun Openg,” ku iya.

Kui Hian bejaku munyi nya lebuh ditanya pemberita rambau Program Bejadika Taman Riverbank Batu Kawah ditu, ensana.

Taja pia, iya agi ngunchi mulut (enggai nyaut) lebuh ditanya sapa bagi nama rintai chalun tu.

“Bedau engkeman endur aku madahka rintai nama tu dulu.

“Pengudah rintai nama chalun tu dianjung, deka bisi aum diatur ila.

“Baka ti ditemu kita, tujuh nama penyandang ari SUPP deka ngetanka kerusi sida empu ba PRN-12 ti deka datai,” ku iya.

Sebedau tu, Sekretari Besai SUPP Datuk Sebastian Ting madahka semua tujuh penyandang Dun ti ‘menang’ dalam PRN-11 suba deka ngetanka kerusi nya baru ungkup PRN-12 tu ila.

Sida tu iya nya, penyandang Dun Piasau Sebastian Ting empu, Dun Batu Kawah Kui Hian, Dun Senadin Datuk Seri Lee Kim Shin, Dun Maradong Datuk Ding Kuong Hiing, Dun Repok Datuk Seri Huang Tiong Sii, Dun Simanggang Datuk Francis Harden Hollis enggau Dun Batu Kitang Lo Khere Chiang.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak