Ukai takut Undi18, tang irauka ujan enggau varian baru

SPAOH: Pengawa Bepilih Nengeri Ke-12 (PRN-12 ti deka diatur enda lama agi laban irauka musin landas enggau penyadi varian baru Covid-19, ku Sapit Kepala Menteri, Datuk Amar Douglas Uggah Embas.

Ku iya, jaku penyakal ti ngumbai Gempung Parti Sarawak (GPS) keran deka ngatur PRN-12 diatu laban takutka Undi18 nya semina jaku selebubu ngapa.

“Musin landas ti disadang nyadi pun taun baru enggau penyadi varian baru Covid-19 entara kebuah GPS milih ngatur PRN-12 diatu.

“Tambah mega, pemutus nya digaga pengudah berunding enggau berandau begulai enggau bemacham raban penerit adat ti bekaul,” terang Uggah.

Uggah mansutka jaku nya pengudah betemu enggau tuai renggat baruh PBB Dun Bukit Saban enggau kaban komiti, kemari.

Uggah mega madah, nadai jamin pengundi biak deka nyadi anti-perintah.

Penyandang Dun Bukit Saban nya madah, pemhawa bepilih deka pedis ati diatur maya musin landas (bulan Januari enggau Februari) enti penusah bah majak nyadi.

“Kitai mega irauka penyadi varian baru Covid-19, kitai enda ulih nyamin varian baru ke lebih agi ari diatu nadai ngerekai dudi hari.

“Nya kebuah, kitai patut ngatur pengawa bepilih diatu lebuh tikas vaksinasyen lebih ari 90 peratus ungkup orang besai tuai enggau kes Covid-19 mega nurun dibanding sebedau tu.

“Taja pia, kitai mesti seruran nitihka Atur Pengawa Standard (SOP) Opis Menteri Pengerai Malaysia (KKM) lalu nya kebuah, KKM enggau Komiti Besai Pengawa Bepilih (SPR) deka ngaga SOP ungkup pengawa bepilih.

Ku Uggah, kimpin tauka pengawa ngabas ari rumah ke rumah enda dikemendar nitihka SOP PRN Melaka.

Nya kebuah ku iya, tuai renggat baruh enggau tim parti deka bejalaika tanggung pengawa besai nentuka kaban parti terus seati enggau nyukung semua chalun GPS.

Ba penuduk iya di Dun Bukit Saban, Uggah enggau penuh pengandal dekaka GPS nyadi kubu kuat ngambi nampung agenda pemansang, penegap politik enggau pemansang ke lebih manah ungkup rayat Sarawak.

Suara Sarawak