Yana Unti deka ngarika Sri Aman ba Pekit Miss Petite Global Sarawak 2021

Yana Unti, 22, siku dara bajik Iban asal ari Nanga Kesit, Engkilili mujur nempa nama ba bidang pemajik gamal pengudah bulih beberapa gelar champion tauka anugerah bekaul ari pekit ke dipasuk.

Taja pan datai ari menua ulu, nya endang nagang Yana terus ngemansangka singkang diri nyapai pemujur ngagai tikas ke tinggi.

Yana benung nampung pelajar tikas degree ba Universiti Malaysia Sarawak (Unimas) ba bidang bidang Pengatur Seni.

Pemajik ke jelan dara, Yana mega ngembuan tuchum ke chukup manis, landik mai diri ba mua kamera sereta nemu ngerebut peluang ba dunya seni.

Yana ngembuan peninggi 158 sentimeter diambi ejensi Tiara Management gawa nyadi model nyambil kenyau ari umur iya, 19 taun laban maya nya iya agi nampung pelajar ba palan pelajar tinggi.

Yana Unti peranak asal ari Nanga Kesit, Engkilili.
Yana Unti peranak asal ari Nanga Kesit, Engkilili.

“Aku diambi gawa ba baruh ejensi Tiara Management ti diempu Pemungkal enggau Perunding Pekit Pemajik Gamal Sarawak iya nya Nickson Simbor.

“Iya udah mayuh ngajar aku pasal dunya seni pemajik gamal. Ari siku personaliti ke enda pejaku ngujungka aku nyadi sapa aku ke diatu,” ku Yana madah ngagai Suara Sarawak.

Entara Pekit Pemajik Gawak ke kala dipasuk Yana iya nya Pekit Miss Unity Sarawak 2019, Miss Valentine 2019, enggau Miss Petite Universe International Sarawak 2020.

“Aku gaga amai laban udah ngambi bagi ba Pekit Miss Petite Universe International Sarawak 2020.

“Ba pekit nya aku bulih gelar Miss Beautiful Skin, Miss Best in Evening Gown enggau mai pulai penuduk lumur tiga ba pekit keterubah dipasuk aku nya.

“Udah tu, aku mega mai nama Sri Aman ba pekit Miss Petite Global Sarawak 2021 ti deka dilancharka Tiara Management enda lama agi. Pekit tu deka berengkah 21 November tu,” ku iya.

Kelimpah ari nya, Yana diatu madahka diri kenyau bulan March taun tu tadi baru deka ngepunka diri ba bidang belakun.

“Keterubah aku ba dunya belakun, aku diasuh mai watak Rebecca dalam siti filem pandak ke dikumbai ‘Sapa Ya’,” ku iya.

Filem nya bekaul enggau kisah tiga iku nembiak sekula ti benung praktikal dikachau semengat antu lebuh diau ba sebuah rumah suwa di sebuah resort.

PENGINGAT…Yana (dua kiba) begambar kenang enggau bala pemekit Miss Petite Universe International Sarawak 2020

Nangkan ke nya, ku filem Sapa Ya nya udah dipandangka ba TVS berengkah bulan June taun tu tadi sereta dikeluarka Serikat Citra Ummah Network.

“Meri aku ngelala dunya belakun tu iya nya ari Ernie Doris, siku pelakun penakan Iban ti udah mayuh peneleba ba dalam seni teater enggau lakon,” ku iya.

Nikal kenang ngagai kisah pengidup diri ke tepejuh ba bidang seni, Yana madah ; Taun 2019 suba, aku semina deka enggau orang nguji aja ba bidang tu, tang majak lama aku nyau tekait ati enggau gawa tu.”

Nambahka nya, ngelansa pasal pemar ke kala ditapi iya, Yana madahka diri mar ngiga personaliti diri empu.

“Aku kebendar siku orang ke malu betemu enggau orang mayuh lebih agi enti betemu enggau orang ke baru dikelala. Nya kebuah, kekadang aku baka enda pechaya ngagai diri empu.

“Dikena mutarka penanggul nya, aku ingatka siti siti jaku ari Tiktok ke madah munyi tu, ‘Other people perception ain’t none of your business’.

“Entara pemar bukai, mesti landik ngatur pejalai ‘catwalk’, chara begambar, postur tubuh enggau ekspresi mua. Semua nya mesti mayuh dilatih,” ku iya.

Berebak enggau nya, Yana deka meri terima kasih ngagai Tiara Management, Citra Ummah Network enggau Ernie Doris laban udah meri iya peluang ngangkatka nama ke diri ba pekit pemajikgamal.

“Enda tinggal mega meri terima kasih ke sukung kami sebilik empu enggau semua kaban belayan,” ku iya.

Yana ngarapka diri terus mujur ba sebarang pengawa lebih agi pekit besai ke deka dipasuk udah tu.

Pesan Yana, ngagai rebak baru ke bisi penau ba bidang seni anang natam pengelandik nya tang patut dibantai ngambika orang nemu pengelebih enggau pengulih ke dikembuan.

“Anang kelalu malu masuk sesebengkah pekit ke ulih dikena ngangatkat tikas pengidup enggau enti deka nyapai juluk ati diri,”ku iya.

Dapatkan kandungan menarik kami di media sosial:
Klik Di Sini -->> Facebook | Tiktok | InstagramYoutube | |  Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak